БИШКЕК, 10-янв. — Sputnik. Мадриддин "Реалы" жаңы машыктыруучу Зинедин Зидандын жардамы менен "Депортиво" командасынын таш-талканын чыгарып, жеңип алды.
4-январда Рафаэль Бенитес отставкага кеткенден кийин, "Реалдын" мурдагы оюнчусу мадрид командасына башкы машыктыруучу болуп келген. Испания чемпионатындагы "Депортиво" менен болгон беттеш (эсеп 5:0) француз үчүн дебют болуп калды.
Зидан футбол дүйнөсүндөгү мыкты оюнчу, ал Франциянын курама командасы менен Дүйнө чемпионаты-98, Евро-2000 оюндарын утуп, 2006-жылдагы биринчиликте финалга чейин жеткен. Ал эми "Реал Мадриддин" курамында 2002-жылы Чемпиондор лигасын жеңип алган.
Зидан "Реал" оюнчусу катары 2002-жылы дал ушул "Депортивого" каршы беттеште алгачкы кадамын таштап, анда гол киргизип, өзгөчөлөнгөн.
