БИШКЕК, 11-дек. — Sputnik. Эл аралык финансы корпорациясы Мамлекеттик салык кызматынын (МСК) ведомстволук сайтын жакшыртууга жардам бере турганын аталган мекеме билдирди.
Ага ылайык, сайттын азыркы абалын баалоонун жана башка өлкөлөрдүн сайттары менен салыштырып талдоонун негизинде МСКнын ведомстволук www.sti.gov.kg сайтын жакшыртуу боюнча сунуштар иштелип чыгат.
Осмонов маалыматты ведомстволук сайтка калкка ыңгайлуу формада жайгаштыруу менен өз маалындагы жана керектүү маалыматтарды берүү салык кызматынын маанилүү милдеттеринин бири экенин белгиледи.
"МСКнын колдонуудагы сайтын ишке киргизген учурдан баштап ага 2012-жылдан бери 4,8 миллиондон ашык адам кирген. Сайттан жарандар МСКнын ишмердиги жана салык маселелери боюнча бардык керектүү маалыматтарды ала алышат", — деди төрага.
Анткен менен учурда сайт чет өлкөлүк сайттардын мисалында салык төлөөчүлөр үчүн керектүү платформа болуп калышы үчүн аны дагы да жакшыртуу маселеси алдыда турары айтылды.
IFC программасынын жетекчиси Кристофер Дэвид Миллер МСКны Орто Азия чөлкөмүндө эң узак мөөнөттүү мамилелери бар IFCтин шериктештеринин бири катары атады.
"Ошондуктан биз Кыргызстандын салык кызматынын сайтын жакшыртууга жан-дилибиз менен көмөк көрсөтөбүз", — деп айтты ал.
Дэвид Миллер ошондой эле МСКда адистердин күчтүү курамы бар экендигин, алардын аракети жемишин берип, натыйжалуу реформалар жүргүзүлүп жаткандыгын белгиледи.
