БИШКЕК, 23-ноя. — Sputnik. "Кыргызстан — кыска метраждуу тасмалардын өлкөсү" эл аралык кинофестивалга катыша турган кыргызстандык тасмалар аныкталганын "Айтыш-фильм" студиясы билдирди.
Маалыматка ылайык, иш-чара үстүбүздөгү жылдын 12-15 декабрь күндөрү өтүп, улуу жазуучу Чыңгыз Айтматовдун элесине арналат. Ага КМШ, Балтия мамлекеттери жана Грузия катышат.
Быйыл бешинчи ирет өтүп жаткан сынакка 10-20 мүнөттүк 10 кыргызстандык тасма катышмай болду.
Уюштуруучулар фестивалда эл сынына коюла турган эл аралык 15 тасманын тизмеси жакын арада белгилүү болорун белгилейт.
