БИШКЕК, 13-ноя. — Sputnik. Американын туристтик порталы Жаңы жылды тосуу үчүн эл көп агылган шаардын рейтингин чыгарды.
Аталган рейтинг Жаңы жыл майрамы алдында брондолгон билеттердин багытын жана суроо-талапты эске алуу менен түзүлгөн.
Ага ылайык, Дубай шаары Жаңы жыл тосуу үчүн эң популярдуу шаар деп аныкталды.
Дубай шаарына мынчалык кызыгуунун жана талаптын көп болушун ага башка шаарлардан оңой учса болору менен түшүндүрүшүүдө. Дубай ошондой эле көз жоосун алган архитектуралык курулуштары менен да туристтерди өзүнө арбайт жана бул шаарда Жаңы жылда эң кооз фейерверктер атылат.
Экинчи орунда Колумбиянын Картахена шаары турат. Бул жылы бул шаарга билет алгандар 68 пайызга көбөйгөн. Үчүнчү орунду Испаниянын Барселона шаары ээледи. Быйыл бул шаарга билет сатып алгандардын саны 51 пайызга өскөн.
Ошондой эле, алдыңкы ондукка Рейкьявик (Исландия), Токио (Япония), Атланта (АКШ), Сантьяго (Чили), Рио-де-Жанейро (Бразилия), Чикаго (АКШ) жана Ванкувер (Канада) шаарлары кирди.
