БИШКЕК, 7-окт. — Sputnik. Премьер-министр Темир Сариев "Бишкек — "Манас" аэропорту" жана Ысык-Көлдөгү айланма жолдорун куруу күчөтүлгөн режимге өтүшү керектигин кеңешмеде билдирди.
Анын айтымында, "Бишкек — "Манас" аэропорту" жолу келерки жылы пайдаланууга берилиши тийиш.
"Жолду курууга 100 миллион сом бөлүнгөн. Ишти күчтөндүрүү жана анын сапатын көзөмөлдөө зарыл. Ысык-Көл облусундагы Тамчыдан Корумдуга чейинки айланма жолдун курулушуна да каражат бөлүнгөн. Бул жаатта тендерди өткөрүү ишин тездетүү керек", — деп белгиледи Сариев.
Мындан тышкары, министрлик Баткен облусунда жалпы сметалык наркы 452 миллион сомдук 24,5 чакырым келген Көк-Таш — Ак-Сай — Тамдык автожолунун курулушун жыйынтыктоодо.
Курулуш иштерине 17 жол куруучу техникасы тартылган. Жолдун курулушунда эки сел тосуучу жай каралып, анда төрт түтүк орнотулмакчы.
