БИШКЕК, 1-окт. — Sputnik. Жалал-Абаддагы Аксы районунун Кербен айылында жайгашкан №14 лицей-интернаттын жетекчилиги мамлекеттик каражатты өзүнө ыйгарып алганы аныкталды.
ИИМдин маалыматка ылайык, аталган окуу жайдын кызматкерлери расмий документтерге жалган маалыматты киргизүү менен медицина адиси катары бир жаранды штатка киргизип коюшкан.
Аталган адам 2014-жылдын апрель айынан тарта жасалма табелдин негизинде мыйзамсыз айлык акы алып келген. Мындан мамлекетке ири өлчөмдө зыян келтирилген.
Аталган факт боюнча Кылмыш жаза кодексинин "Ишенип берилген мүлктү өз максатына пайдалануу" жана "Документтерди жасалмалоо" беренелеринин негизинде кылмыш иши козголду.
Учурда тергөө амалдары жүрүп жатат.
