БИШКЕК, 23-сен. — Sputnik. Төртүнчү ирет өткөн кыргыз-россиялык аймак аралык конференциянын жыйынтыгы менен жети меморандумга кол коюлуп, резолюция кабыл алынганын Экономика министрлиги билдирди.
Маалыматка ылайык, иш-чарада Кыргызстан менен Россиянын ортосундагы мамилелер талкууланып, мындан аркы кызматташуунун келечеги тууралуу айтылды.
Иш-чарада Кыргызстандын ЕАЭБге кошулушу менен туура жана келечектүү жолго карай багыт алганы, артыкчылыктары белгиленди.
Конференцияга Башкыртстандын жетекчиси Рустэм Хамитов, Саратов, Оренбург, Новосибирск облустарынын губернаторлору, Евразиялык экономикалык комиссиянын жана ири компаниялардын өкүлдөрү катышты.
Аталган иш-чара КР Экономика министрлиги жана РФ Экономикалык өнүктүрүү министрлиги тарабынан уюштурулду.
