Уят сөздөр менен сөгүшкөн видеодогу төрт милиционер тилинен тапты

БИШКЕК, 24-авг. — Sputnik. Ош шаардык ички иштер башкармалыгынын жол кайгуул кызматынын өкүлдөрүнүн өз ара кайым айтышуусу тартылган видео тасма боюнча Кыргызстандын ИИМнин Ош шаары жана Ош облусу боюнча башкы башкармалыгы кызматтык иликтөө жүргүзүп, тиешеси бар тараптарга жазасын берди. Бул тууралуу Ош шаардык ИИББдин маалымат катчысы Замир Сыдыков билдирди.

Интернет булактарына милиция кызматкерлеринин уят сөздөр менен сөгүшкөн видеосу тараган. Анда тартип коргоо органынын формасын кийген киши Жол кайгуул кызматынын автоунаасынын жанында оозго алгыс сөздөр менен экинчисин сөгүп жатканы тартылган. Кызуу кандуу формачан кишинин ар бир экинчи сөзү балит сөздөр, сөгүнүү менен айтылып жатканын угууга болот. Айрым маалыматтарга ылайык, кайым айтышуу жол кайгуул кызматынын инспекторлору башка милиция кызматкеринин баласынын машинасын токтоткону үчүн чыккан.

ИИМдин Ош шаары жана Ош облусу боюнча башкы башкармалыгынын жетекчиси Сүйүнбек Өмүрзаковдун бүгүнкү, 24-августтагы буйругу менен видео тасмага тартылып калган Ош шаардык ички иштер башкармалыгынын жол кайгуул кызматынын үч кызматкери жана Ош шаардык ички иштер башкармалыгынын бир кызматкери органдардан биротоло бошотулду. 

Учурда бул кызматтык жазага кириптер болгон кызматкерлердин жетекчилигине кызматтык жаза берүү каралууда.