БИШКЕК, 18-июнь – Sputnik. Түркиянын Куралдуу Күчтөрүнүн аскер ательесинин директору баш болгон адистер Коргоо министрлигинин турмуш-тиричиликтик жактан тейлөө комбинатынын кызматкерлерин түрк өндүрүшүнөн чыккан жаңы кийим тигүүчү машиналарда иштөөгө үйрөттү. Окутуунун максаты — аскердик кийимдерди чыгарууга даярдоо. Бул туурасында КРдин Башкы штабынын маалымат кызматы билдирди.
Түркия тарап КР Коргоо министрлигинин комбинатынын кызматкерлерин өз жериндеги окуу курстарына чакырды.
"Алар Коргоо министрлигинин аскер ательесинин кызматкерлерин тигүү жабдыктарын тейлөөгө, оңдоого, ошондой эле менджмент жана бычуу өнөрлөрүн жакшыртуу, өркүндөтүүгө үйрөтүүнү убада кылды", — деп маалымдады Башкы штабдын маалымат кызматы.
Башкы штаб Коргоо министрлигинин тейлөө комбинатын заманбап жабдыктар менен камсыздоо жана аларды жеткирүү максатында Түркиянын "NGS" компаниясы менен 500 миң АКШ долларына тиешелүү келишимдер түзүлгөндүгүн билдирди. Жаңы жабдуулар техникалык көрсөткүчтөрү боюнча күнүнө 400-500 комплект аскер кийимин даярдап чыгарат. Жаңы үлгүдөгү аскер кийимин биринчи жолу биздин аскер кызматчылар үстүбүздөгү жылдын 9-майында өткөн Жеңиш Парадында кийип чыгып, жалпыга көрсөтүлгөн.
