БИШКЕК, 16-июнь — Sputnik. Социалдык тармактардын пайдалануучулары бүгүн Дөлөн Өмүрзаков атындагы стадиондо өтө турган Кыргызстан-Австралия беттешүүсүнүн 10-мүнөтүндө бардык күйөрмандарды текши туруп кол чабууга үндөшүүдө.
Адилет Турсунбеков Facebook социалдык тармагында Кыргызстандын курама командасы 100-эл аралык оюн өткөрүп жатканын жазган.
"Оюндун 10-мүнөтүндө стадиондогу күйөрмандардын баарын бир мүнөт бою катуу кол чаап турууга чакырам. Муну менен биз футболдун көркөмүн арттырабыз. Бөлүшүп, биздикилерди колдойбуз!", — деп жазат Адилет.
Турсунбеков Sputnik агенттигине демилгени достору менен бирге көтөрүп чыкканын билдирди.
"Азырынча бизди жүздөй адам колдоп жатат. Балким, кечке чейин көбөйүп каларбыз. Демилге колдоого алынып кетсе, сонун болмок", — дейт күйөрман.
Беттешүү Дөлөн Өмүрзаков атындагы стадиондо кечки саат сегизде башталат.
КР курама командасы В тайпасына кирди. Кыргызстандыктар Австралия, Иордания, Тажикстан жана Бангладеш командалары менен ат салышат. Чемпионаттын финалдык бөлүгү 2018-жылы Россияда өтөт.
