БИШКЕК, 16-июнь — Sputnik. Дөлөн Өмүрзаков атындагы стадиондо өтө турган футбол боюнча Кыргызстан-Австралия командаларынын оюнунда коомдук тартипти эки миң милиция кызматкери карай турганын Бишкек ШИИБ маалымат кызматы билдирди.
Беттешүү бүгүн, 2015-жылдын 16-июнунда кечки саат сегизде башталат. Белгилүү болгондой, атаандаштар 14-июнда Кыргызстанга келишкен. Кыргызстандык футболчуларды колдоо иретинде президент Алмазбек Атамбаев оюнчулар менен машыгуу учурунда жолугушуп, командага жалпы кыргыз эли ишенип жатканын билдирген.
Маалыматка ылайык, оюнга билеттер төрт күн мурун сатылып, учурда 500ү гана калган. Сатыкка бардыгы болуп 18 миң 338 билет чыгарылган.
Июнь айында 2018-жылы Россияда өтө турган дүйнө чемпионатына карата Азиянын экинчи тандоо туру башталды. Кыргызстандын курама командасы дүйнө чемпионатына болгон сапарын жеңиштен баштады.
КР курама командасы В тайпасына кирди. Кыргызстандыктар Австралия, Иордания, Тажикстан жана Бангладеш командалары менен ат салышат.
Шаардык милиция бардык күйөрмандарды тартип бузбоого чакырат.
