БИШКЕК, 26-май — Sputnik. Бишкек-Ысык-Көл автожолунун айрым бөлүктөрүндө жеңил автоунаалардын максималдуу ылдамдыгы жогорулатыларын республикалык жол-кайгуул кызматынын өкүлү Тилек Оторов билдирди.
Анын айтымында, ушу тапта унаа ылдамдыгынын жеткен чеги саатына 90 чакырымды түзөт. Бул эреже жеңил автоунааларга да, жүк ташуучу унааларга да бирдей тийиштүү.
"Учурда трассанын калк отурукташпаган бөлүгүндө унаанын максималдуу ылдамдыгын саатына 110 чакырымга чейин жогорулатуу боюнча маселе каралып жатат. Аталган бөлүккө автотрассанын айланма жолу жана дагы бир катар бөлүктөрү кирет", — деди Оторов.
Ал ылдамдык чеги туристтик сезондун ачылышы алдында унаа ээлеринин өтүнүчү менен өзгөрүп жатканын билдирип, жүк ташуучу унаалардын ылдамдык чеги өзгөрбөстөн, саатына 90 чакырым боюнча каларын кошумчалады.
Оторов ылдамдык чеги өзгөргөн жолдун бөлүктөрүндө атайы белгилер коюларын, кенен маалымат жалпыга маалымдоо каражаттарына кошумча жарыяланарын айтты.
