БИШКЕК, 2-фев — Sputnik. Талас шаарындагы Эшим Кутманалиев атындагы стадиондо 50дөй киши нааразычылык акциясына чыкты. Митингге чыккандар төө буурчактын арзан болуп атканына жана электр энергиясынын кымбатташына каршы болуп, абалды жөнгө салууну талап кылышкан.
Талас шаардык мэриясынан Sputnik сайтына билдиришкендей, митинг тынч өткөн.
"Мэрияга 1-февралда митингге чыгабыз деп 28-январда "Талас ынтымагы коому" кыймылы кайрылган", — деп билдирди мэриядан.
Өкмөттүн Талас облусу боюнча өкүлчүлүгүнүн басма сөз катчысы Мухаммеджан Суранчиевдин айтымында, митингге чыккандар менен бийлик өкүлдөрү жолукту.
"Митингчилер төө буурчактын арзан болушуна, электр энергиясынын кымбатташына нааразы болуп, облус аймагындагы алтын кендерин иштетпейбиз деген талаптарды койгон. Нааразычылык акциясына чыккандар менен өкмөттүн Талас облусу боюнча ыйгарымдуу өкүлүнүн биринчи орун басары Байыш Жуманазаров, Энергетика жана өнөр-жай министрлигинин статс-катчысы Батыркул Баетов жана Талас шаарынын мэри Анарбек Кушубеков жолукту", — деди ал.
Суранчиев ошондой эле, митингчилерге Б.Баетов электр энергиясына болгон жаңы тариф тууралуу маалымат бергенин белгиледи. Февраль айына чейин 700 кВт сааттан ашык колдонгондор 2,05 сомдон төлөп келсе, февраль айынан баштап анын баасы 1,82 сомго чейин төмөндөгөн.
Облустук администрациянын басма сөз катчысы төө буурчактын арзан болуп жатышынын себептерине токтолду.
"Былтыр Кытай менен Түркияда төө буурчак көп айдалып, түшүмү мол болгон. Бизде былтыр төө буурчактын түшүмү жакшы болбой, сапаты да анчейин болбой калды. Албетте, бул факторлор да анын баасына таасир берип жатат", — деди ал.
Учурда төө буурчактын бир килограммы 50-55 сомдон сатылууда. 2013-жылы анын баасы 100-120 сомго чейин көтөрүлгөн.
Өткөн жылдын аягында Нарындын тургундары да электр энергиясынын кымбатташына каршы нааразычылык акциясына чыгышкан.
