БИШКЕК, 19 янв — Sputnik. Федералдык миграция кызматынын Ярославск облусу боюнча башкармалыгы Борбор Азиядан мыйзамсыз келген мигранттарды өлкөдөн чыгарууну баштады. Алардын катарында Кыргызстандын да жараны бар болуп чыкканы мекеменин тараткан маалыматында айтылат.
Федералдык миграция кызматынан билдиргендей, күзүндө эле кармалгандардын бардыгы мекеменин бөлүштүргүч-кабылдамасында кармалып турган.
"Алардын Россияда иштөөгө уруксат берчү кагазы түгүл, бирөөсүндө да ким экенин аныктаган документ болгон эмес. Аларга чек арадан өтүүдө керек болгон справка жана мекенинен паспорт алууга жардам бере турчу документ гана берилди", — деп маалымдайт миграциялык кызматтын маалымат кызматы.
Россиядан чыгарылгандар 2 миңден 5 миң рублге чейин айып төлөшкөн. Салынган административдик айыптын деңгээлине жараша эми аларга Россиянын аймагына кирүүгө 5 жылдан 10 жылга чейин чектөө коюлат.
Аларды Москвадагы аэропортко чейин миграция кызматынын кызматкерлери менен тийиштүү органдын өкүлдөрү коштоп барды.
