АКШ: полиция дагы бир афроамерикалыкты өлтүрүп алды. Качып баратканда аткан видео

БИШКЕК, 14-июн. — Sputnik. АКШнын Атланта шаарында полиция кызматкери 27 жаштагы афроамерикалык Рэйшард Бруксту атып, ал ооруканада жан берди. Бул тууралуу РИА Новости жазды.

Ал эми окуянын видеосун RT Телеграм каналы жарыялады.

Окуя өткөн жума күнү болуп, ишемби күнү шаарда нааразычылык акциясы башталды. Буга чейинки маалыматтарга караганда, полицияга автоунаа туура эмес жерде токтоп тургандыгы тууралуу маалымат түшкөн. Тез татым жайынын алдындагы орунду ээлеп алган автокөлүктүн ичинде Рэйшард Брукс аттуу жаран уктап жаткан. Полиция анын мас экенин көрүп, кармап кетүүгө аракет кылган. Ошол маалда ал укук коргоочулардын биринин электрошокерин жула качкан. Полиция Бруксту көздөй ок чыгарып, ал ооруканада көз жумган. Ал эми Атлантанын полиция жетекчиси Эрика Шилдс отставкага кеткен.

Массалык башаламандыктын катышуучулары эми автоунааларды өрттөгөнгө чейин барууда. Полиция аларды таратуу үчүн көздөн жаш чыгарган газды колдонду.

Маалыматка караганда, жаранга ок чыгарган полиция кызматкери кызматтан алынды, дагы бири убактылуу четтетилди.

Эске салсак, 46 жаштагы афроамерикалык Жорж Флойд майдын аягында Миннеаполисте полиция кармап күч колдонгондон кийин көз жумган. Маркум жасалма акча пайдаланды деген шек менен кармалган. Полиция кызматкерлери афроамерикалыктын колуна кишен салгандан кийин жыгып, үчөөлөп басып калган видео тараган. Бирөөсү моюндун күрөө тамыр өткөн бөлүгүн тизеси менен кысып, басып турат. Флойддун бир нече жолу "дем ала албай жатам" деп айтып, андан кийин тынчып калганын көрүүгө болот.

Анын өлүмү элдин жаалын кайнатып, АКШда эле эмес, башка жерлерде да нааразылык толкундарын жаратты. Ал эми Американын бир нече шаарында башаламандык болуп, талап-тоноо күч алган.