12:13 25 Бугу 2019
Түз эфир
  • USD69.8500
  • EUR78.1272
  • RUB1.0811
Видео

Садык Шер-Нияз өкмөттүн абийирин кетиргенде. Депутаттын жаалданган видеосу

Кыскача шилтеме алуу
330010

Депутат акыркы 25 жылда оозго ала турчу бир да маданият өкүлү чыкпаганын өкүнүү менен белгиледи.

Жогорку Кеңештин депутаты Садык Шер-Нияз өкмөттүн бир жылдык жасаган иши боюнча берген отчетунда маданият тууралуу болгону алты сап гана жазылганын айтып, катуу нааразы болду.

Ал өз сөзүндө тарыхта маданият өкүлдөрүнүн жасаган иши каларын айтып, ханыша Елизевата Iнин тушунда Англиянын алтын доору болуп, Шекспир өңдүү бир катар белгилүү таланттуу инсандар чыкканына токтолду.

Шер-Нияз Кыргызстандын аткаминерлери чет жакка чыкканда дал ушул маданият өкүлдөрүн алып барарын, бирок аларга жетиштүү көңүл бурулбай жатканын айтты.

"Биз эмне үчүн башка жакка барганда маданият инсандарынын этегине жабышып жүрөбүз? Башка жакка барганда биз ошолор менен мактанабыз, сыймыктанабыз. Кыргызстанды сактай турган эң биринчи өзөк бул анын жери, тили жана маданияты да. Чыңгыз Айтматовдой, Төлөгөн Касымбековдой, Мукай Элебаевдей, Таттыбүбү Турсунбаевадай, Төлөмүш Океевдей, Болот Шамшиевдей кимдин атын атай алабыз? Кимди чыгара алдык? Кайсы инсанды "мына ушуну биз чыгардык" деп айта алабыз? Кимди? Менин оюмча эч кимди айта албайбыз", — деди депутат.

Эл өкүлү ошондой эле акыркы 25 жылда Кыргызстанда үч гана нерсе абдан жакшы жакка коюлганына токтолду.

"Биз 25 жылдан бери үч гана нерсени жакшы аткарып келе жатабыз. Бул — президенттик шайлоо, премьер-министрди шайлоо жана парламентти шайлоо. Руханий багытта эмне болду, кандай жылыштар болду? Чыңгыз Айтматов менен Алыкул Осмоновдун мекенинде оозго ала турчу бир жазуучу, акын жок. Муратбек Рыскловдун мекенинде бир театр жылдызы жок. Карап көрүңүз акыбалын? Ушул маданият өкүлдөрүн өстүрүш үчүн 15-20 миллион карап коюш керек эле го...", — деди Садык Шер-Нияз.

Депутат, андан сырткары, ТЭЦтин мунарасын 18 миллионго талкалагандай жумуштар болсо маданият өкүлдөрүнө айтса, алар күрөк-ломун көтөрүп алып барып иштеп берерин, ошого кеткен акчаны маданиятка которуп коюуну өтүндү.

Белгилей кетсек, өкмөт 2018-жылы жасаган иши боюнча Жогорку Кеңеште отчет берип, парламент аны канааттандырарлык деп тапты. Добуш берүүгө "Ата Мекен" фракциясы толугу менен баш тартты.

Белгилер:
маданият, Жогорку Кеңеш, Садык Шер-Нияз

Дагы видео

ЭҢ МААНИЛҮҮ