Мавлянова бүгүн парламенттин жалпы жыйынында Кытайдын туристтери үчүн визасыз режим киргизүү керектигин айтып чыккан. Ал мындай жол менен Кыргызстанда туризм тармагы өнүгө турганына токтолгон.
Бирок эл өкүлүнүн бул сунушун коомчулук кыжырдануу менен кабыл алып, катуу сындап жатат.
"Кытайдан келген туристтерден шек санай бербей, жакшы жагын да карашыбыз керек. Мисалы, дүйнөдөгү туризм тармагынан түзүлгөн ички дүң продукциянын 30 пайызын дал ушул кытай туристтери калтырып кетет. Дүйнөдөгү туристтердин 30 пайызын дагы кытайлыктар түзөт. Ошондуктан биз ушул потенциалды колдонушубуз керек", — деди Мавлянова.
Ал ошондой эле бардык Кытай жарандарына эмес, туристтерге гана визасыз келүүгө уруксат берүү керектигин кошумчалады.
