Бириккен Араб Эмирлигинде (БАЭ) өтүп жаткан футбол боюнча Азия кубогу Кыргызстан курама командасы үчүн ийгиликтүү болууда. Эми футболчуларыбызды алдыда дагы бир чоң сыноо күтүп турат. Команда 1/8 финалда БАЭ курамасы менен ойномокчу. Sputnik Кыргызстан маалымат агенттиги ФИФАнын азыркы рейтингинде 79-орунда турган атаандаш команда тууралуу кызыктуу фактыларды сунуштайт. Эскерте кетсек, Кыргызстан аталган тизмеде 91-сапты ээлеп турат.
Дүйнөлүк чемпионатка катышкан. Алгачкы оюнун 1972-жылы өткөргөн БАЭнин футбол боюнча курама командасы өз тарыхында бир топ эле ийгиликтерге жетишкен. 1990-жылы биринчи жана акыркы жолу Дүйнөлүк чемпионатка катышуу укугуна ээ болгон. Бирок тайпасындагы Германия, Югославия жана Колумбияга жеңилип, акыркы орунду ээлеген.
Азия кубогунда күмүш тагынган. БАЭ Азия кубогуна буга чейин тогуз жолу катышып, үч жолу байгелүү орундарга татыган. 1992-жылы төртүнчү орунду ээлесе, өз үйүндө өткөн 1996-жылкы мелдеште күмүш медаль тагынган. Ал эми төрт жыл мурунку кубокто 3-орунду багындырган.
Тайпасында лидер. БАЭ ушу тапта өз тайпасындагы үч оюнду бир жеңиш жана эки тең чыгуу менен бүтүрүп, биринчиликти эч кимге берген жок. Алар Бахрейн жана Таиланд менен 1:1 эсебинде ойноп, ал эми Индияны 2:0 менен жеңишти.
Италиялык машыктыруучу. БАЭ курама командасын белгилүү италиялык машыктыруучу Альберто Дзаккерони машыктырат. Кызматына 2017-жылы келген адис өз кезегинде "Милан", "Интер" жана "Ювентус" сыяктуу футболдун алп командаларын жетектеп келген. БАЭге чейин төрт жыл Япония курама командасын машыктырып, аны менен 2011-жылы Азия кубогун жеңип алган.
Кыргызстан менен БАЭнин оюну 21-январь күнү саат 23:00дө Абу-Даби шаарындагы "Зайед Спорт Сити" стадионунда өтөт.
