Интернетте полиция кызматкерлери Флойддун колуна кишен салгандан кийин жыгып, үчөөлөп баса калган видео тараган. Экспертизанын жыйынтыгы дал ошол маалда Флойд муунуп, аба жетпей калганынан көз жумганын көрсөттү. Учурда төрт полиция кызматкери иштен алынып, бирөөнө "кокусунан өлүмгө дуушар кылган" деген айып тагылууда.
Америкада жашап, окуп, иштеп жаткан кыргызстандыктар арбын. Тышкы иштер министрлиги массалык башаламандыкта жабыркандардын арасында КР жарандары жок экенин айтты. Sputnik Кыргызстан агенттиги ар кыл штатта жашаган мекендештер менен байланышып, ал жакта түзүлгөн кырдаал жана абалы тууралуу маалымат алды. Айрымдар аты-жөнүн ачыктагысы келген жок.
Кылыч Кыргыз, Чикаго шаарынын жашоочусу: акциялар токтобосо, Трамп армияны киргизерин айтты
— Флойддун өлүмү АКШнын борбордук шаарларында (Даун таун) элдин нааразычылыгын жаратты. Мындай көрүнүш эки-үч күндөн бери Чикаго шаарында да уланууда. Акциялар талап-тоноочулук менен коштолуп жатат. Азыр кечки саат тогуздан эртең мененки алтыга чейин комменданттык саат киргизилди.
АКШ президенти Дональд Трамп да штат жетекчилигине "эгер башаламандыкты токтото албасаңар, анда мен бийлигимен пайдаланып армияны киргизип, ызы-чууну басам" деген таризде билдирүү таратты.
Нью-Джерси штатында жашаган кыргызстандык жигит: көбүртүп-жабыртып жатышат
— Учурда Нью-Джерсиде абал жакшы эле. Америкада да революциялар учурунда Кыргызстан тушуккан талап-тоноочулук болду. Бирок негедир абалды өтө курчутуп, көбүртүп чагылдырып жатышкандай сезилет. Саат 20:00дөн эртең мененки 6:00гө чейин комменденттык саат жарыяланды. Ал эми бул жакта жашаган кыргызстандыктар кадимкидей эле иштеп жатышат. Көбүнчөсү трак айдап, курулуш тармагында эмгектенет.
Бермет Байкелова, Нью-Йорктун жашоочусу: абал курч
— Нью-Йоркто абал курч. Биз жашаган штатта жалаң бай, заманбап райондор, чоң-чоң соода түйүндөрү таланып-тонолуп жатат. Борбордогу таанымал бренд дүкөндөрдү талкалап кетишти. Бир түнгө эле, түнкү саат 11ден эртең мененки 5ке чейин комменданттык саат киргизилген. Комменданттык сааттын убактысы ар бир штатта ар башка коюлду. Анткени убакыт бирдей эмес. Бийлик абалды байкап көрүп, комменданттык саат киргизүү маселесин чечет. Нааразычылык акциялары, бейбаштык жосундар токтобосо, Дональд Трамп катуу чара көрөрүн айтты. Нью-Йоркто ушу тапта үч миңдей кыргыз жашайт. Бизге ызы-чуунун кереги жок. Ошол себептен баары өз иши менен алек. Башаламандыкка көбүнчө жумушу жок, өмүр бою мамлекеттин колун карап отургандар чыгып жатат. Америкадагы кыргыздар мыйзамды сыйлайт, тартиптүү. Акция катышуучуларынын талабы аткарылып, Флойдду өлтүргөн полиция кызматкери камакка алынды. Ага карабай башаламандык уланып жатканын туура эмес кабылдагандар көп.
Лос-Анджелес шаарында жашап, трак (жүк унаасы) айдап иштеген кыргыз жигит: таксиде иштеген кыргызстандыктарга кыйын болду
Кечээ мен Калифорнияга Нью-Мексика аркылуу келдим. Жол боюндагы бир шаарга кире турган чоң жолду жаап, полицейлер курчап туруптур. Көрсө, акцияга чыккандар чоң жолдо трак айдагандарды тоноп, сабаган учур катталып, токтоткондордон качкан айдоочу бир адамды тебелетип кетиптир. Ошондой эле токтогон эки унаанын айдоочуларын акция катышуучулары тоноп, сабап жатышканда полицейлер келип куткарып калган экен.
