БИШКЕК, 20-апр. — Sputnik. Саламаттык сактоо министрлиги карантинден улам иштебей жаткан медиктерге маяна төлөбөй турган болду. Бул туурасында министрдин буйругу чыкканын ведомствонун маалымат кызматы билдирди.
15 Чын Куран 2020, 14:19
Белгилей кетсек, өлкөдө коронавирусту ооздуктоо үчүн киргизилген өзгөчө абал жана өзгөчө кырдаал режимине байланыштуу медициналык мекемелердин жана башка мамлекеттик органдардын айрым кызматкерлери акы төлөнүүчү эмгек өргүүсүнө кеткен.
Министрликтин №235 буйругунда жаш курагы улуу, өнөкөт оорусу барлар жана кош бойлуулар сыяктуу тобокелчилиги жогору турган кызматкерлер эмгек өргүүгө чыгарылган.
Бирок 15-апрелде саламаттык сактоо министри №235 буйрукту жокко чыгаруу чечимин кабыл алганы айтылат.
“Ал ортодо эмгек акы төлөөнү жөнгө салуу маселеси боюнча айрым учурларды эске алып, аталган буйрук жокко чыгарылды. Ал жагдайларды Эмгек жана социалдык өнүктүрүү министрлиги менен биргеликте карап чыгып өкмөткө токтом долбоору даярдалып жатат”, — деп айтылат маалыматта.
Маяна төлөөдөн баш тартуу боюнча буйрук буга чейин социалдык тармакта талкууланып, анын чын-бышыгын билүүгө ашыккандар көп болчу.
