БИШКЕК, 15-янв. — Sputnik. Forbes журналынын россиялык версиясы Google компаниясында 11 жыл иштеген кыргызстандык Тилек Мамутовдон интервью алды.
Тилек Мамутов 1985-жылы Бишкекте архитектор жана инженер-куруучунун үй-бүлөсүндө төрөлгөн. 16 жашында Борбор Азиядагы Америка университетине программист адистигине тапшырган.
2006-жылы Тилектин англис тилинде жазылган резюмесин Manpower (Google компаниясынын Ирландиядагы кеңсесине кызматкер издеген ортомчу) HR-агенттигинин рекрутери байкап калган.
Мамутов биринчи тандоо турунан өтпөй калса, экинчи жолкусунда ийгилик жылмайып, Google компаниясынын Дублиндеги кеңсесине ишке алынган.
"Бишкекте төрөлгөн Тилек Мамутов Google компаниясынын Дублиндеги кеңсесинен сунуш түшкөнгө чейин карьерасын мекенинде түптөп жаткан. Кийин аталган компанияда 11 жыл эмгектенген. Ал жактан кеткенден кийин стартап негиздеп, учурда КМШдагы таланттуу адистерге карьера жасоого жардам берүүдө", — деп айтылат материалда.
Кыргызстандыктын айтымында, 2011-жылы аны вице-президент Мэган Смит байкап калып, Google компаниясынын Борбор Азиядагы бизнести өнүктүрүү боюнча тармагын жетектөөнү сунуштаган. Бул кызматта турган кезде ал компаниянын башкы директору Эрик Шмидт менен Google Ideas борборунун директору Джаред Коэндин Кыргызстанга сапарын уюштуруп берген. Мамутов баштаган топ-менеджерлер өлкө президенти жана ишкерлери менен жолугушкан.
Кыргызстандык программист ири келишимдин аякташын күтүп жүрүп, 2008-жылы иштен кеткен. Кийин иниси Медер менен көптөн бери кыялданып жүргөн Outtalent стартапын ишке киргизген.
Учурда анын стартапы өнүгүп келе жаткан өлкөлөрдөгү жана КМШдагы таланттуу программисттерге чет өлкөдөгү беделдүү компанияларга ишке орношууга жардам көрсөтүп келет.
Outtalent 2019-жылдын май айында ишке кирген. Ишти баштоого бир тууган Мамутовдор өз каражатынан 10 миң доллар жумшаган.
Компания ачылгандан бери ондогон адамды Google, Facebook, Amazon, Microsoft, Bloomberg жана Stripe сыяктуу ишканаларга орноштурган.
