БИШКЕК, 17-июн. — Sputnik. Өкмөттүн "Жакыр жашаган жана аз камсыз болгон үй-бүлөлөргө социалдык келишимдин негизинде бир жолку социалдык жардам көрсөтүү жөнүндө" токтом долбоору коомдук талкууга коюлду. Бул тууралуу аталган мекеменин маалымат кызматы кабарлады.
Билдирмеге ылайык, аталган токтом долбоорду жакыр жашаган, аз камсыз болгон үй-бүлөлөрдү колдоо максатында Эмгек жана социалдык өнүктүрүү министрлиги иштеп чыккан.
"Сунушталган документке ылайык, министрлик тарабынан жакыр жашагандарга бир жолу 100 миң сомго чейин социалдык жардам берилет. Ал акчага үй-бүлө жеке чарбасындагы ишин жөнгө салып же чакан бизнес ачышы керек. Же болбосо үйдөгүлөрдүн бирин окутуп, ишке орношуусуна керектеши зарыл. Бул каражат берилерден мурда аз камсыз үй-бүлө Эмгек жана социалдык өнүктүрүү министрлигинин социалдык келишимине кол коёт. Андан соң каражатты белгилүү бир милдеттенмелердин негизинде керектей алышат", — деп жазылат маалыматта.
Токтом долбоордо жакыр жашагандардын эмгекке жарамдуулары өз алдынча иш ачам десе, аларга кайтарымсыз акча берилери тууралуу да кошумчаланган.
Убактылуу жобону ишке ашырууга жыл сайын Эмгек жана социалдык өнүктүрүү министрлигинин бюджетинен 300 миллион сом каралмакчы.
