БИШКЕК, 6-фев. — Sputnik. Кыргызстанда эң аз төрөлгөн муун ишке жарамдуу куракка жеткендигин Улуттук статистика комитетинен билдиришти.
Ведомство 2012-2016-жылдардын демографиялык отчету менен тааныштырды. Анда жыл өткөн сайын эмгекке жарамдуу жарандардын саны төмөндөп баратканы көрүнүп турат (2012-жылдын башында жалпы элдин 61 пайызы ишке жарамдуу болсо, 2017-жылы бул көрсөткүч 59,1 пайызга түшкөн).
"Бул көрүнүш эң аз төрөлгөн муундун ишке жарамдуу куракка жеткендиги менен байланыштуу. Тагыраагы, 1990-жылдарын аягында Кыргызстанда төрөлүүнүн саны кескин кыскарган болчу", — деп айтылат маалыматта.
Буга чейин Улуттук статистика комитети өлкөдө канча жаштагы адамдар көп экенин аныктаган. Маалыматка ылайык, ушул тапта баарынан бир жаштагы бөбөктөр көп.
