21:02 20 Жетинин айы 2019
Түз эфир
  • USD69.8500
  • EUR77.2506
  • RUB1.0910
Кыргызстандын режиссеру Мирлан Абдыкалыковдун архивдик сүрөтү

"Жөө күлүктүн" Кореядагы ийгилиги. Фильм эл аралык сыйлыкка ээ болду

© Пресс-служба президента КР / Султан Досалиев
Маданият
Кыскача шилтеме алуу
146 0 0

ФИПРЕССИге кезегинде белгилүү режиссерлор Эмир Кустурица, Андрей Тарковский, Френсис Форд Коппола, Роман Полански, Микеланжело Антониони жана Вим Вендерс татыган.

БИШКЕК, 14-окт. — Sputnik. Кыргызстандын режиссеру Мирлан Абдыкалыковдун "Жөө күлүк" фильми Пусандагы (Түштүк Корея) эл аралык кинофестивалда кино сынчылардын сыйлыгына — ФИПРЕССИге ээ болду. Бул туурасында картинанын продюсери Алтынай Койчуманова билдирди.

ФИПРЕССИ – кино сынчылар менен кино изилдөөчүлөрдүн башын бириктирип, дүйнөлүк киноискусствону өнүктүрүүгө салым кошкон, бул жаатта жазгандардын кызыкчылыгын коргогон эл аралык уюм. Бул автордук кинолордун ичиндеги эң жогорку сыйлыктардын бири.

Аталган сыйлыкка кезегинде белгилүү режиссерлор Эмир Кустурица, Андрей Тарковский, Френсис Форд Коппола, Роман Полански, Микеланжело Антониони жана Вим Вендерс татыган.

Пусандагы кинофестивалдын алкагында ФИПРЕССИнин калыстар тобунун мүчөлөрү Премчанд Поттангади (Индия), Илейн Герини (Бразилия) жана Сео Кок-Сук (Түштүк Корея) сыйлык режиссерго "баланын көз карашы менен көйгөйдү чеберчиликте бергени" үчүн тапшырылды дешти.

Абдыкалыков эми "Жөө күлүктү" Германияда өтө турган Schlingel деп аталган балдардын жана өспүрүмдөрдүн эл аралык кинофестивалына алып бармакчы.

Түштүк Кореянын Пусан шаарында өткөн эл аралык кинофестивалда "Жөө күлүк" фильминин дүйнөлүк премьерасы болгон.

Режиссер "Жөө күлүктө" үй-бүлөнү сактоого жан үрөгөн өспүрүм Жекшендин баяны аркылуу ата-энесиз калып, тагдырдын оор сыноосуна кабылган жаш балдардын көйгөйүн көтөрөт.

Кадимки айыл турмушунда Жекшен оор сыноолорду башынан кечирип, чоңдордун маселесин өзү чечүүгө мажбур болот. Ошол эле учурда балалык сезимдерден да кур калбайт. Табиятынан күлүк бала мектептеги жарыштарга, тушоо тойлорго катышып атаандаштарын артта калтырат. Кинокартинада адамдык мамиле, достук, ынактык жана сүйүү темасы чагылдырылат.

Тасманын сценарийин Мирлан Абдыкалыков жана Эрнест Абдыжапаров жазган, коюучу оператору Талант Акынбеков, сүрөтчүсү Адис Сейталиев, продюсерлери Алтынай Койчуманова, Айбек Жангазиев.

Ал эми фильмде Темирлан Асанкадыров, Руслан Орозакунов, Мээрим Атантаева, Илимбек Калмуратов, Улан Өмүралиев, Айнура Качкынбек кызы жана Жеңиш Кангелдиев ойногон.

Тема боюнча

Илгиз Шернияз: кино тартып дүйнө кыдырса болот
Белгилер:
кино, Алтынай Койчуманова, Мирлан Абдыкалыков, Түштүк Корея

ЭҢ МААНИЛҮҮ