БИШКЕК, 16-ноя. — Sputnik. Республикалык балдар жана өспүрүмдөр арасындагы "Карек" кинофестивалы жыйынтыкталып, жеңүүчүлөр аныкталды. Бул тууралуу Sputnik Кыргызстан маалымат агенттигине "Карек" балдар кинофондусунун жетекчиси Толкун Дайырбекова билдирди.
Анын айтымында, быйылкы кинофестивалга катышуу үчүн 75 тасма түшүп, анын ичинен конкурстук программадан 15 тасма гана өткөн. Сыйлык тапшыруу аземинде катышуучулар кино жаатындагы белгилүү адамдар менен жетелешип кызыл килемден өтүштү.
"15 тасманын ичинен калыстар тобу 10 фильмди мыкты деп тандап, ар кандай номинацияда байге тапшырды. Алсак, 17 жаштагы Малика Куштарованын "Мальчик который выжил" деген фильми мыкты анимациялык тасма аталды. Ал эми мыкты даректүү тасма катары Дмитрий Виноградов менен Жакшылык Шералиевдин "Менин сүйүүм" фильми тандалса, Салим Ногойбеков жана Тимофей Власовдун "Ботаник" тасмасы мыкты көркөм тасма номинациясын жеңип алды. Балдарга баалуу сыйлык катары атайын статуэтка жана фотоаппарат, планшет тапшырылды", — деди Дайырбекова.
Экинчи жылы өткөрүлүп жаткан "Карек" кинофестивалынын башкы максаты — интернет, техниканын заманында балдарды бош отургузбай пайдалуу иш жасоого үндөө.
Фестивалда мыкты көркөм фильм аталган "Ботаник" тасмасынын режиссеру Салим Ногойбеков жеке мектептердин биринде 8-класста окуйт. Тасма тартуу жөн гана хоббиси экенин айтты.
"Бул менин алгачкы тасмам болду. Сценарий жазууга атам жардам берип, досторум менен бирге бул чыгарманы жараттык. Тасма окуучу баланын жашоосу тууралуу", — деди Салим.
Фестивалга 7 жаштан 17 жашка чейинки балдар-кыздар катышкан.
