КР муфтийинин орун басары Акимжан ажы Эргешов эмне себептен кошумча акча кошулуп жатканын мындайча түшүндүрүп берди.
"160 доллардын кошулуп жатышы быйылтан тарта ажылык сапары эң ысык учурга туш келип жаткандыгынан болууда. Сауд Аравиянын аймагындагы шарт өтө катаал, жайдын саратанында аба ырайы 50-55 градуска чейин ысыйт. Андыктан Ажылык министрлиги зыяратчыларга шарт коюп, кондиционери бар чатырларга жайгашууну сунуштап жатат. Ал чатырлар отко туруктуу жана салкын келет," — деди ал.
Ошол эле учурда Кыргызстандагы ажылыктын баасы коңшуларга салыштырмалуу 600 долларга арзан экенин айтты.
Белгилей кетсек, быйыл кыргызстандык зыяратчылар үчүн Сауд Аравиясы 4 585 орун бөлгөн. Ажылык сапардын баасы буга чейин 2600 доллардын тегерегинде болору айтылып, анын 1550 доллары жол киреге кетмек.
