БИШКЕК, 9-мар. — Sputnik. Ажылык сапарга барчуларды каттоо иши жана төлөмдөрдү кабыл алуу аяктагандыгын муфтияттан кабарлашты.
"Учурда 4924 жаран ажылыкка баруу үчүн алгачкы төлөм болгон 400 долларды банкка төлөшкөн. Азыркы мезгилде электрондук тизмеге катталган жарандардын документтерин толуктоо жана аларды серверге жайгаштыруу иштери улантылууда", — деп Кыргызстан мусулмандарынын дин башкармалыгынан айтышты.
Муфтияттан ажылык сапарга барчуларга берилүүчү квотанын саны 4 585 экендигин, ал эми быйыл ал сандан кийин катталгандар автоматтык түрдө кийинки жылдагы зыяратчылардын тизмесине кирерин айтышты.
"Эгерде арыз берген адам 4 586-болуп катталды дейли. Демек, ал жаран 2018-жылы Меккеге баруучулардын тизмесине автоматтык түрдө киргизилет", — деди муфтияттын маалымат бөлүмүнүн өкүлү Максат Атабаев.
Буга чейин Кыргызстанга былтыркыга салыштырмалуу 900гө көп квота берилип, 4 585ти түзгөнүн кабарлаган. Ажылык сапардын баасы 2600 доллардын тегерегинде, анын 1550 доллары жол кире.
