БИШКЕК, 30-дек. — Sputnik. Президент Алмазбек Атамбаев батирлер менен үйлөрдү убактылуу, тагыраагы, бир нече саатка же бир күнгө киреге берүүгө тыюу салган мыйзамга кол койду.
Мындай мыйзам Жогорку Кеңеште шаардыктардын бир нече арыздарынан кийин 16-ноябрда кабыл алынган. Андан мурда мэрия бир ирет борбор калаанын "Чыгыш-5" кичи районунда жашаган Марина Хмельницкая атууу аялды кошуналарынын арызынан улам сотко берип, муниципалитет сотто утуп алган. Соттун чечими менен №19 үйдө батирди киреге берүүгө тыюу салынган. Бирок жергиликтүү тургундар аталган "бизнес" учурда деле уланып жатат деп билдиришүүдө. Эми үйлөрдү мейманкана катары берүүгө мыйзамдын негизинде тыюу салынып, ага баш ийбегендерге административдик айып салына турган болду.
Мындай "ишмердүүлүк үчүн" жарандар 7 миң, кызматтагылар 9 миң, ал эми юридикалык тарап 70 миң сомго чейин айып төлөйт.
Мыйзамда ички иштер органдарынын мыйзам бузуу болду деген ишти дареги боюнча карап, административдик айып салуусу жазылган.
