Лукашенко БУУнун абалы жана ШКУнун ролу тууралуу билдирүү жасады
© Sputnik / Алексей Даничев
/ Жазылуу
БИШКЕК, 1-сен. — Sputnik. Шанхай кызматташтык уюму (ШКУ) көп уюлдуулукту калыптандырууда чечкиндүү кадамдарга барбаса убакыттан уттуруп, азыркы БУУнун кейпин кийип калышы мүмкүн. Бул тууралуу Беларусь президенти Александр Лукашенко Бишкекте өтүп жаткан "ШКУ плюс" саммитинде билдирди.
Ал алгач Кыргызстанды БУУнун Коопсуздук кеңешине туруктуу эмес мүчө болуп шайланышы менен куттуктап, Бишкектин төрагалыгы алкагында БУУнун ролун жана көп уюлдуу дүйнөнү талкууга койгон демилгесин жогору баалады. Ошону менен бирге ал эл лидерлерден куру сөз эмес, реалдуу аракеттерди күтүп жатканын белгиледи.
"Эл бизден конкреттүү кадамдарды күтүүдө. Эгер убакытты өткөрүп жиберсек, дал азыркы БУУнун кейпин кийип калышыбыз ыктымал. Ал эми келечекте, тескерисинче, биз БУУну айыктыруунун катализатору болуп беришибиз керек. Анткени дүйнөдө ШКУнун катышуусуз климаттын өзгөрүшү, коопсуздук же энергетика сыяктуу бир дагы глобалдык маселени чечүү мүмкүн эмес", — деди Лукашенко.
Президенттин кебинин урунттуу учурлары:
Саясий пикир келишпестиктерден жана Батыштын каршылыгынан улам БУУда жылбай калган эл аралык коопсуздук, киберкоркунучтарга жана наркотрафикке каршы күрөш сыяктуу маанилүү чечимдерди ШКУ форматында алдыга жылдырууга болот;
ШКУ бир тараптуу санкциялык басымдарга каршы туруу, өз ара инвестицияларды стимулдаштыруу, бажы иштерин жеңилдетүү жана транспорттук коридорлорду өнүктүрүү боюнча натыйжалуу чечимдерди кабыл алууга жөндөмдүү;
Беларусь мамлекеттер аралык жаңы жүрүм-турум маданиятын түптөө максатында "XXI кылымдагы евразиялык көп түрдүүлүк жана көп уюлдуулук хартиясын" сунуштады. Бул документти талкуулоо ноябрь айында Минск коопсуздук конференциясында уланат.
Лукашенко ШКУда бардык өлкөлөр тең укуктуу болгону менен негизги демилгелер уюмдун эң кубаттуу үч лидеринен — Кытай, Россия жана Индиядан чыгышы керектигин, бирок азырынча андай чечкиндүү кадамдар байкалбай жатканын кошумчалады.
