Мамытов: жасалма интеллект туура колдонулса экономикага жардам берет
"Жасалма интеллект жөнүндө сөз болгондо эле биринчи кезекте кайсынысы болбосун, аны туура колдонуу зарылдыгын айткым келет. Эгер туура колдонсок, ал өндүрүштү күчөтүп, адам ресурсун азайтып, убакытты жана каражатты үнөмдөөгө шарт түзөт. Бирок азырынча бизде, жалпы эле дүйнөдө жасалма интеллект анчалык деңгээлде тарай элек. Азыр биз айтып-деп жаткан жасалма интеллект — болгону тил модели. Азырынча ошонун гана күчүн сезип, таң калып жатабыз. Тил моделин өзгөчө маалымат, текст менен иштеген кесип ээлери өз жумушунда колдонсо болот. Мисалы, юристтер, ондогон барактан турган мыйзамдарды окуп түшүнүш үчүн көп убакыт коротпой эле ЖИ жардамы менен анын маңызын түшүнүп алса болот. Болбосо журналисттер маалымат жазууда, илимпоздор архивдик маалыматтар менен иштөөдө туура колдонсо оң натыйжасын берет. Туура колдонуу деген эмне? Буга ЖИнин берген бардык маалыматына ишене бербей бир нече булактан текшерүү кирет. Анткени мунун башатында кайра эле адамдар турарын унутпашыбыз керек. Ал эми чыныгы жасалма интеллект тууралуу сөз боло турган болсо, ооба, ал өндүрүштө, медицинада чоң жардам бере алат. Анын арты менен экономика өр алат. Өзгөчө робот техникасы менен айкалашкан иш жүрсө адистердин ордун басып, бир канча кесиптер жоюлуп, тескерисинче, жаңылары пайда болгон учур келет. Биз ошого баратабыз", — деди Мамытов.
