Кыргызстанда жасалган капсулалык үйлөрдү ЕАЭБ рыногунда эмне күтөт?
13:47 08.12.2025 (Жаңыртылды: 15:52 08.12.2025)
© Sputnik / Арууке Амирдинова
Жазылуу
Капсулалык үйлөрдү курган жергиликтүү компаниянын негиздөөчү Нурсултан Азимов менен экономист Улукман Мамытов аталган ишкерликтин ЕАЭБ мамлекеттериндеги келечегин талкуулашты.
Кыргызстандан чыгарылган капсулалык үйлөрдүн азырынча КМШ мамлекеттеринде атаандашы жок. Бул тууралуу Нурсултан Азимов Sputnik Кыргызстан радиосуна маек куруп жатып билдирди.
Анын айтымында, мындай курулуш туристерди тосууга абдан ыңгайлуу.
"Авиациялык аллюминийден курулган үйлөрдүн рынокто пайда болгонуна 10 жылдай болуп калды. Кыргызстанда азырынча мындай курулуш жүргүзгөн биз жалгыз компаниябыз. Бул үйлөр негизинен туризм багытына ылайыкташат. Кытайдан алып келип, башка жабдууларын Кыргызстандан алып үйдү чогултуп чыгабыз, анан кардардын каалаган жерине алып барып орнотуп беребиз. Алгач бул долбоор пайда болгон өлкө Кытай болгондуктан алар 30 жылга кепилдик беришет экен, биз 20 жылга беребиз, анткени бизде климат башка. Азыр бир эле үйдү куруп койбой төрт багытта иштеп жатабыз. Атайын жер алып орнотуп даяр туристтик жай кылып сатууга чыгаруудабыз. Жакында ЕАЭБ рыногуна чыгабыз. Анткени Евразия экономикалык биримдикке мүчө мамлекеттердин баарынын туристтик келечеги зор. Мен бул долбоорду башташыма да Россияда көп жыл иштегеним түрткү болду. Сочи, Анапа же Сибирь жактагы туризмди көрүп, бизде да ушундай жогорку сервистер түзүлсө деп кыялдандым. Чыныда Россияда туризм бизден алда канча өнүккөн, бирок бизде да ошого жетүү мүмкүнчүлүктөрүбүз бар. Ошол кыялдын ишке ашышына өзүм да себепкер болгум келди. ЕАЭБ рыногуна чыгууну максат кылганыбыз да ушундан, анткени бул өлкөлөр арасында туристтик кыймылдар, өзгөчө тоо туризми күчөсө дейбиз", — деди Азимов.
Экономист Улукман Мамытов мындай креативдик чечимдер мамлекет менен биргеликте ишке ашса келечеги туруктуу болорун айтат.
"Атаандашы жок бизнес куруу бир чети жакшы, эмнени баштасаң да ал коомго жайылып кетүү мүмкүнчүлүгү бардай сезилет. Бирок ошол эле учурда сапат, алдыга болгон өнүгүү жана кардарлардын капчыгын карасак, бул бизнеске да атаандаштык сөзсүз керек", — деп кошумчалады Мамытов.
Долбоордун негиздөөчүсү капсулалык үйлөргө кетчү материалдардын 80 пайызга чукулу ата мекендик өндүрүшчүлөрдөн алынарын белгиледи.
