Мамытов: ЕАЭБ өлкөлөрү менен завод куруп, темир жол аркылуу товар экспорттоого болот
13:36 03.11.2025 (Жаңыртылды: 14:39 03.11.2025)
© Sputnik / Асель Сыдыкова
Жазылуу
Экономист Улукман Мамытов Кыргызстан — Өзбекстан — Кытай темир жолун экспортко чыгууга колдонуу үчүн өндүрүштү колго алуу зарылдыгын айтат.
Кыргызстан — Өзбекстан — Кытай темир жолу долбоорунда Кыргызстан жөн гана транзиттик өлкө болуп калбашы керек. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, учурда өлкөнүн импорттон көз карандылыгын кескин азайтууга жакшы мүмкүнчүлүктөр бар.
"Биз дагы деле импортко абдан көз каранды өлкөбүз. Жылына 2,5-3 миллиард доллар өлкөдөн чыгып кетет. Бул өз кезегинде сомдун курсун түшүрүп, инфляцияны жогорулатат. Биз автомобилдерге керектелүүчү тетиктерден тарта жеп-ичкен тамак-ашыбызга чейин импорттойбуз. Президент өлкөнүн алдына чоң тапшырмаларды койду. Эми аларды кыска убакытта аткаруу үчүн өндүрүштү колго алып, кайра иштетүүнү жандандырышыбыз керек. Ооба, аракеттер жок эмес. Бирок алар бирдиктүү болбой жатат, ирилешпей жатабыз. Кайра иштетүү же өндүрүш десе эле казып алган картошканы же тигип жаткан кийимдерибизди айта берген болбойт. Масштабдуу багыттарга, көлөмдөргө чыгышыбыз керек. Эки жол бар. Биринчиси — ЕАЭБдин кооперативдик ишкерлик долбоорунун алкагында Россия, Казакстан сыяктуу мамлекеттер менен биргеликте заводдорду куруу, экинчиси — ошол заводдордон чыккан өнүмдөрдү Кыргызстан — Өзбекстан — Кытай темир жолу аркылуу өндүрүшкө чыгаруу. Бул — мыкты уюштуруучулук жана дипломатия болсо эле ишке ашырууга мүмкүн болгон кадамдар", — деди Мамытов.
Ал ошондой эле өндүрүштү колго алып алган соң инфраструктураны жакшыртып, акчалуу туристтердин келишин шарттоого мүмкүнчүлүктөр жараларын кошумчалады.
