Байсалов: жагымдуу айлана-чөйрөдө жашоо – адамдын негизги укугу
22:45 30.06.2025 (Жаңыртылды: 09:28 01.07.2025)
© Фото / пресс-служба кабмина КР
Жазылуу
БИШКЕК, 30-июн. — Sputnik. Жагымдуу айлана-чөйрөдө жашоо — адамдын негизги, базалык укугу. Бул тууралуу бүгүн министрлер кабинетинин төрагасынын орун басары Эдил Байсалов анын төрагалыгында өткөн КРдин Адам укуктары боюнча координациялык кеңешинин жыйынында айтты.
Министрлер кабинетинин маалымат кызматынын билдирүүсүнө ылайык, жыйында бул тармактагы эл аралык милдеттердин аткарылышына байланышкан маселелер талкууланды. Атап айтканда, БУУнун Адам укуктары боюнча кеңешинин универсалдуу баяндамасынын алкагында төртүнчү улуттук баяндаманы коргоонун, ошондой эле Расалык дискриминациянын бардык түрлөрүн жоюу боюнча эл аралык конвенциянын жоболорун аткаруу боюнча 11 жана 12-бириктирилген баяндамалардын жыйынтыктары чыгарылды.
"Айлана-чөйрөнүн булганышы – борбор калаада, ири шаарларда жана айылдарда таза абага болгон укуктун бузулгандыгы болуп саналат. Ачык айтканда, бул – адам укуктары тармагындагы башкы көйгөй. Жарандардын өмүрүнө жана саламаттыгына чыныгы жана узакка созула турган коркунуч", — деген министрлер кабинетинин төрагасынын орун басары.
Байсалов үч-төрт жыл мурун мындай абалга жоопкерчиликти мурдагы бийликке төңкөрүп коюп жүрүшкөн болсо, бүгүнкү күндө “көйгөйдүн жөнгө салынбашы биздин кемчилик” деп белгилеген.
"Дал ушул таза абага болгон укук маселеси Кыргызстан үчүн адам укуктарын камсыз кылуу жаатындагы эң негизги чакырык болуп турат. Бул багытта мамлекеттин, жергиликтүү өз алдынча башкаруу органдарынын, бардык аткаруу бийлик органдарынын, жарандык коомдун жана бизнес-чөйрөнүн күч-аракетин бириктирүү учурдун талабы болуп турат", — деген аткаминер.
Мындан тышкары, кеңеш тарабынан БУУнун Адам укуктары боюнча комитетинин сунуштарын ишке ашыруу багытында 2025-2027-жылдарга карата иш-чаралар планы бекитилди. Алар:
жыйындын жүрүшүндө анын катышуучулары жагымдуу айлана-чөйрөдө жашоо укугунун сакталышына мониторинг жүргүзүү боюнча баяндаманы угушуп, климаттын өзгөрүшүнө каршы күрөшүү багытындагы мамлекеттик саясий чараларды талкуулашты;
кеңештин курамындагы өзгөрүүлөрдү бекитишти;
БУУнун кыйноолорго каршы комитетинин сунуштарын аткаруу боюнча 2025-жылдын биринчи жарым жылдыгына карата иш-аракеттер планынын ишке ашырылышы жөнүндөгү отчетту карашты.
Минкабдан отурумдун жыйынтыгы боюнча тиешелүү чечимдер кабыл алынып, аткаруу бийлигине тапшырмалар берилгенин кошумчалашты.
