Акыркы мүмкүнчүлүк! ТИМ башчысы “кара тизмедеги” мигранттарга кайрылды
18:05 10.05.2025 (Жаңыртылды: 10:23 11.05.2025)
Жазылуу
БИШКЕК, 10-май — Sputnik. Тышкы иштер министри Жээнбек Кулубаев Россиянын “кара тизмесиндеги” мигранттарга кайрылып, убакытты текке кетирбөөгө чакырды.
Анын айтымында, РФ президенти Владимир Путинге өлкө башчы Садыр Жапаров кайрылып, дагы бир мүмкүнчүлүк берилүүдө. Ошондой эле ал “кара тизмедеги” 70 миң мекендештин үч миңге жакыны гана реестрден чыкканын белгиледи.
“Убакытты текке кетирбей аймактык миграция бөлүмдөрүнө же Кыргызстандын Россиядагы элчилигине жана консулдук мекемелерине кайрылып, керектүү маалыматтарды тактап, укуктук абалды мыйзамдаштыруу жол-жоболорун баштаңыздар. “Сентябрга чейин убакыт бар да” деп жүрө бербеңиздер. Анткени аз калганда полиция бөлүмдөрүндө, миграция кызматтарында, элчилик жана консулдуктарда кезек көп болуп, үлгүрбөй калышыңыздар мүмкүн”, — деген Кулубаев.
Ошондой эле ал Россия тарап ички иштер бөлүмдөрүнүн иштөө убактысын эки саатка узартканын кошумчалаган.
“Дагы узартат” деген үмүт менен кайдыгер карабагыла. Мөөнөт бүткөндө “өкмөт жардам берген жок”, “президент сүйлөшкөн жок” деген дооматтар негизсиз болот. ТИМ жарандардын укуктарын коргоого жана мекендештерибизге мыйзам чегинде көмөк көрсөтүүгө даяр. Ошону менен бирге, мыйзамдашуу аракетин өз убагында көрүү ар бир жарандын жеке жоопкерчилиги экенин эскертебиз”, — деп жазылган кайрылууда.
Министр 1-сентябрга чейин реестрден чыкпагандар депортация болорун эскертип, коюлган талаптар жеңил эле экенин айткан.
Реестрден чыгуу үчүн төмөнкү аракеттер талап кылынат:
аймактык миграциялык бөлүмгө кайрылып, “кара тизмеге” кирген себебин тактоо керек;
дактилоскопия, медициналык кароодон өтө электер — Москвадагылар Сахарово борборуна, аймактагылар РФ ИИМинин тиешелүү миграциялык бөлүмдөрүнө кайрылышы керек.
Кыргызстан ЕАЭБге мүчө болгондуктан эмгек келишимин түзүү негизги талап болуп саналат. Анткени анын негизинде:
миграциялык картанын жана каттоонун мөөнөтү узартылат;
жашаган дареги боюнча каттоо жүргүзүлөт;
документтерде кемчилик болсо (мисалы, каттоонун же келишимдин мөөнөтү өтүп кеткен болсо) — 5000–7000 рубль өлчөмүндө айып төлөп, андан соң документтер мыйзамдаштырылат.
21 Чын Куран 2025, 21:33
