Молдалиева: эмдөөдөн баш тарткан сайын кызамык күчөй берет
© Sputnik / Асылбек Бактыбеков
Жазылуу
Республикалык клиникалык инфекциялык оорукананын башкы дарыгеринин орун басары Нургүл Молдалиева кызамык оорусуна байланыштуу шаардагы абал боюнча айтты.
Учурда республикалык жугуштуу илдеттер ооруканасы кызамык менен иштеген тогуз бөлүмдүн үчөөсүн жаап, штаттык режимде иштеп жатат. Бул тууралуу Нургүл Молдалиева Sputnik Кыргызстан радиосунун эфиринде маек куруп жатып билдирди.
Молдалиева: эмдөөдөн баш тарткан сайын кызамык күчөй берет
Анын айтымында, кызамык — бул вакцина менен башкарыла турган оору. Башкача айтканда, эмдөөдөн баш тарткандар көбөйгөн сайын оору күчөй берет.
"Кызамык менен ооругандардын жаш өзгөчөлүктөрү ар кандай. Булардын дээрлик баары — эмдөө албагандар же бир жашка чейинки эмдөө убагы келе электер. Тилекке каршы, учурда кайра жандандыруу бөлүмүндө бир бала жатат. Бардык жерде эле кызамык боюнча абал курч боюнча калууда. Бирок ага карабастан Саламаттык сактоо министрлигинин, Республикалык ден соолукту чыңдоо борборунун, Республикалык иммунопрофилактика борборунун, муфтияттын жана үй-бүлөлүк дарыгерлер тобунун аракети менен кызамык менен ооругандардын саны бир аз азайып келе жатат. Буга чейин биздин оорукананын тогуз бөлүмүнө кызамык менен ооругандарды араң батырып келсек, 1-марттан баштап ооругандардын санына байланыштуу үч бөлүмдү жаап штаттык режимде иш алып бара баштадык. Учурда алты бөлүмдө кызамыкка чалдыккан оорулуулар дарыланып жатышат. Оорунун деңгээлине жараша дарылоо жүрөт. Кызамык болгондордун баары эле ооруканага жата бербейт. Орто жана оор абалдагылар стационарга жаткырылат. 2024-жылдын аягынан баштап кызамык менен ооругандардын саны кескин көбөйүп кетти. Статистика боюнча, 2024-жылы 6774 учур катталса, ал эми 2025-жылдын эки айында эле 1801 учур катталды", — деди Молдалиева.
Ал кызамыкты чакырган вирус башка вирустарга салыштырмалуу жугуштуулугу боюнча алдыда экенин кошумчалады.
