"Кыргыз почтасы" өнүгүү рейтингинде чоң ийгиликке жетти
© Sputnik / Асель Сыдыкова
Жазылуу
"Кыргыз почтасы" ачык акционердик коомунун башкы директорунун орун басары Уулжан Масиянова почта кызматы 2016-жылдан бери автоматташтырылган системада иштеп жатканын айтты.
"Кыргыз почтасы" ачык акционердик коому Дүйнөлүк почта союзунун эл аралык бюросунун бешинчи деңгээлдеги 172 мүчө өлкөлөрдүн арасынан 29-орунду ээледи. Ошентип ишкана Дүйнөлүк почта союзуна мүчө өлкөлөрдүн почта администрацияларынын өнүгүү рейтингинде олуттуу ийгиликке жетишти. Бул тууралуу Уулжан Масиянова Sputnik Кыргызстан радиосунун эфиринде маек куруп жатып билдирди.
"Кыргыз почтасы" өнүгүү рейтингинде чоң ийгиликке жетти
Анын айтымында, 2018-жылы Дүйнөлүк почта союзу тарабынан "Кыргыз почтасына" жеткирүүлөр үчүн 18 автоунаа жана электрондук тараза алып берилген.
"2020-жылы "Кыргыз почтасы" мамлекеттик ишканасы бул рейтингде 98-орунду ээлесе, 2021-жылы 65-орунга, ал эми 2022-жылы 60-орунга көтөрүлгөн. Ошентип акыркы үч жылда "Кыргыз почтасы" 98-орундан 29-орунга көтөрүлдү. Мындай натыйжага системалуу аракеттерибиздин жана почта инфраструктурасын активдүү модернизациялоонун аркасы менен жетти. Дүйнөлүк почта союзуна мүчө болгон соӊ биз милдеттенмелерин аткарышыбыз керек. Анын бири автоматташтырылган системада иштөө болуп саналат. "Кыргыз почтасы" 2016-жылдан бери аталган системада иштеп келе жатат. Ал эми 2023-жылы Дүйнөлүк почта союзунун IPS (International Postal System) системасынын толук версиясына өттүк. Ошондой эле тейлөөнү жакшыртууга, почта жөнөтмөлөрүн тездетип жеткирүүгө жана "Кыргыз почтасы" ААКтын мүмкүнчүлүктөрүн кеңейтүүгө багытталган көптөгөн жаңы долбоорлор ишке киргизилди. Трансчекаралык электрондук сооданы өнүктүрүү жана эл аралык почта алмашууну өткөрүүнү тездетүү үчүн Кыргызстан жана КЭРдин почта кызматтарынын транспорт каражаттары үчүн "жашыл коридор" түзүлгөн", — деди Масиянова.
Ал эл аралык почта жөнөтмөлөрүн тез жана натыйжалуу жеткирүүнү камсыз кылуу үчүн Германия, Австрия, Эстония, Латвияда эл аралык алмашуу жайынын өкүлчүлүгү ачылганын кошумчалады.
