Салык кызматкери 10% киреше салыгы кайсы учурда төлөнөрүн түшүндүрдү
© Sputnik / Асел Акмат
Жазылуу
Мамлекеттик салык кызматынын жергиликтүү салыктар бөлүмүнүн башчысы Эрмек Мааткасымов 10 пайыз киреше салыгы кайсы учурда алынарын түшүндүрүп берди.
Бир жылдын ичинде мүлк сатып алып кайра сатсаңыз, анын пайдасынан гана 10 пайыз салык алынат. Бул тууралуу Эрмек Мааткасымов Sputnik Кыргызстан радиосунда маек куруп жатып билдирди.
Салык кызматкери 10% киреше салыгы кайсы учурда төлөнөрүн түшүндүрдү
Анын айтымында, коомдогу мүлктүн толук суммасынан салык алынат деген пикир жаңылыш.
"Алып сатуудан 10 пайыз киреше салыгы боюнча коомчулукта салыктын жаңы түрү киргизилди деген кептер айтылууда. Негизинен бул салык 2008-жылдагы Салык кодекси ишке киргенден бери каралган. Болгону буга чейин айрым мамлекеттик органдар менен маалымат алмашуу маселе жаратып келген. Учурда 2022-жылда тийиштүү мекемелер санариптештирилип, маалымат алмашуу жеңилдеп, алына баштады. Ошондуктан элге салыктын жаңы түрүндөй сезилүүдө. Белгилей кетүүчү жагдай, бул салык, биринчиден, бир жылдын ичинде сатып же сатып алуу жүргүзүлгөндө колдонулат. Ошол эле учурда салык көрүлгөн пайдасынан гана алынат. Мисалга тургун 300 миң сомго автоунаа алып, аны оңдоп-түзөп, тетиктерин алмаштырып 50 миң сомдой сарптады. Натыйжада унаанын наркы 350 миң сомго чыкты. Анан рынокто 400 миң сомго кардар чыкса, ошол 50 миң сомунан гана киреше салыгы алынат. Ал эми тетик алууга, аны оңдотууга кеткен чыгымын гана көрсөтүү жетиштүү болот. Башкача айтканда, жаран ошол 400 миң сомдон киреше салыгын төлөбөйт. Болгону чыгымдардын квитанция, чектерин сактап коюу зарыл", — деди Мааткасымов.
Ошондой эле ал бир жылдан ашырып саткандар үчүн бул салыктын түрү колдонулбай турганын кошумчалады.
