Курманбеков: РКӨФ 1000дей жумуш орду түзүлө турган үч долбоорду каржылоодо
13:18 28.09.2023 (Жаңыртылды: 13:47 31.10.2023)
© Sputnik / Асель Сыдыкова
Жазылуу
Кыргыз-орус өнүктүрүү фондунун башкаруучулугунун мүчөсү Бакыт Курманбеков фонддун ишмердүүлүгү тууралуу маалымат берди.
Кыргыз-орус өнүктүрүү фонду тарабынан 1000дей жумуш ордун түзө турган үч ири долбоор каржыланууда. Бул тууралуу Бакыт Курманбеков Sputnik Кыргызстан радиосунда маек куруп жатып билдирди.
Курманбеков: РКӨФ 1000дей жумуш орду түзүлө турган үч долбоорду каржылоодо
Анын айтымында, бул долбоорлор мамлекеттик кепилдик механизми аркылуу ишке ашууда.
"2015-жылдан бери аталган фонд тарабынан 3 363 долбоор 578 миллион долларга каржыланды. Учурда фонддун насыялык портфелинин көлөмү 260 миллион доллар. Демек, ишкерлерге берилген каражаттын 60 пайыздайы кайтарылды. 3 248 кичи жана орто ишкерлик менен алектенгендерге 233 миллион доллар кредит берилди. Мындан тышкары, 113 долбоор фонддон түз каржыланып, жалпы көлөмү 335 миллион долларды түздү. Булардын көпчүлүгү мамлекет үчүн маанилүү болгон цемент жана кафель чыгаруучу заводдорго каржы бөлүнүүдө. Мындан тышкары, энергетикалык багытта жалпы 7 долбоор жактырылган. Алардын жалпы кубаттуулугу 153 мегаватт, наркы 183 миллион доллар болсо, анын 72 миллиону фонд тарабынан каржыланууда. Анын ичинде 100 мегаваттык Куланак ГЭСи бар. Калгандары кичи ГЭСтер. Ошондой эле жалпы кубаттуулугу 312 мегаваттка жеткен шамал жана күн электростанциялары курулушун каржылоо пландалууда. Ошол эле Куланак ГЭСинин курулушунда 1000 адам жумуш менен камсыздалды. Ишке кирсе 200 киши ар дайым иштейт. Цемент заводу 700, кафель чыгаруучу завод 300 кишини иш менен камсыз кылат", — деди Курманбеков.
Ошондой эле ал түзүлгөн ишканалар жыл сайын аудиттен өтүп туруу талабы коюлганын кошумчалады.
