Онколог аялдар милдеттүү түрдө өтө турган текшерүүлөрдү тизмектеп берди

© Фото / Pexels/ MART PRODUCTIONОоруканадагы аял жана дарыгер. Архив
Ооруканадагы аял жана дарыгер. Архив - Sputnik Кыргызстан, 1920, 22.01.2023
Жазылуу
НовостиTelegram
Дарыгер улгайган аялдар арасында рак илдетине чалдыгуу коркунучу жогору экендигин эскертип, бул куракта медициналык кароодон байма-бай өтүп турууну сунуштаган.
БИШКЕК, 22-янв. — Sputnik. Аялдардын медициналык текшерүүдөн өтүп туруусу көп учурда жатын моюнчасынын жана эмчек рагын алдын алууга жардам берет. Бул тууралуу онколог, медицина илимдеринин кандидаты Антон Ильин "Известия" басылмасына берген маегинде билдирди.
Анын айтымында, дарыгерлердин кароосунан өтүп жатып анчалык маани берилбеген, мисалы, зааранын чыгып кетиши, жыныстык дисфункция, ички органдардын сезгениши сыяктуу учурларды да аныктоого болот.
Дарыгер ооруну алдын алуу үчүн кандай текшерүүлөрдөн канча жолу өтүү керектиги аялдардын жаш курагына жараша бөлүнөрүн айткан.
Мисалы, 20-30 жаштагы кыз-келиндерге жылына жок дегенде бир жолу гинекологиялык текшерүүдөн өтүү кажет.
"Мурда 20 жаштагы кыздарга эмчек бездерин текшерүүгө эрте дечүбүз, бирок бүгүнкү күндө онкология жашарып баратат. Ошондуктан эки жылда бир жолу УЗИден өтүү керек", — деген Ильин.
30-40 жаштагы аялдарда жатындын жана сүт бездеринин ракка чалдыгуу коркунучу жогору. Андыктан бул куракта жыл сайын гинеколог менен маммологдун кароосунан өтүп туруу зарыл.
Адистин айтымында, аялдар үчүн өтө кооптуу курак 40-50 жашта башталат. Мында гормоналдык өзгөрүүлөргө байланыштуу көптөгөн оорулардын коркунучу кескин көбөйөт. Бул куракта медициналык текшерүүдөн өтүүдө аялдар жатын моюнчасынын жана эмчек бездеринин залалдуу шишиктерин алдын алат.
"50-60 жаштагы аялдар арасында рактын жайылышы жогору болгондуктан, бул топтогулар дарыгерлердин кароосунан байма-бай өтүп турушу зарыл. Аялдарда туруктуу менопауза пайда болот. Бул заараны кармай албай калуу жана жыныстык дисфункция сыяктуу жагымсыз нерселерге алып келет. Ал эми медициналык байкоо аларды алдын алып, убагында чара көрүүгө шарт түзөт", — деп аяктаган онколог.
Кыз эмоционалдык стресс учурунда. Иллюстративдик сүрөт - Sputnik Кыргызстан, 1920, 21.01.2023
Адам өзүнүн эмоционалдык жактан чарчаганын кантип билсе болот? Жооп
Жаңылыктар түрмөгү
0