Мектептер агайларга муктаж! Министр кайрылуу жасап, акция жарыялады. Видео

Жазылуу
Билим берүү жана илим министри Уланбек Мамбетакунов мектептерде эркек мугалимдердин азайып баратканына тынчсызданып кайрылуу жасады. Мындан улам "Мектеп агайларга муктаж" аттуу акция жарыяланганын билдирди.
Акциянын максаты — агайларды мектепке тартуу жана мектептер агайлардын үнүнө муктаж экенин билдирүү менен мугалимдик кесиптин улуулугун даңазалоо.
"Бүгүнкү күндө билим берүү тармагында көптөгөн мугалимдер эмгектенип, келечек муунга билим берүү менен биргеликте тарбия берүү процессин дагы жүргүзүп келүүдө. Окуучулар үчүн агартуучуларыбыз мугалим гана эмес, сыйлуу, урматтуу инсан катары кабылданып, жогорку статусту алып жүрүшөт. Ушул инсандардын арасында эжейлерибиз менен биргеликте агайларыбыз дагы билим берүү ишинде өзгөчө орунда турары баарыбызга маалым. Тилекке каршы, акыркы жылдары мектепте иштеген агайлардын саны азайып баратат. Бул көрүнүш балдарыбызга тарбия ишин жүргүзүүдө кандайдыр бир жетишпестиктерге алып келиши мүмкүн", — деди Мамбетакунов.
Ошондой эле ал акциянын жүрүшүндө азыркы тапта мектептерде эмгектенип жаткан агайларды коомчулук менен тааныштырып, сыйлуу кесиптин ээси экени баяндаларын кошумчалады.
Катышууну каалаган бардык жарандар өзүнүн мектебиндеги агайы тууралуу ролик тартып, социалдык баракчасына Билим берүү жана илим министрлигинин баракчасын белгилеп, #мектептерАгайларгамуктаж хештегин жазып, 23-февралга чейин жайгаштыруусу шарт.
Тема боюнча:
Жогорку Кеңеш мугалимди шылдыңдагандарга айып салуу мыйзамын кабыл алды
Жаңылыктар түрмөгү
0