Травматолог: жаракат алган адамды ары-бери жылдыруу туура эмес
© Sputnik / Асель Акмат
Жазылуу
Дарыгер Медербек Кармышбеков кыш мезгилинде муздуу жерлерден айланып өтүүгө чакырды.
Кардын жаашы менен травматологиялык жаракат алгандардын саны башка мезгилдерге салыштырмалуу 2-3 эсе көбөйөт. Бул тууралуу Медербек Кармышбеков Sputnik Кыргызстан радиосуна маек куруп жатып билдирди.
Травматолог: жаракат алган адамды ары-бери жылдыруу туура эмес
Албетте, адам качан куларын билбейт, бирок муздан тайып жыгылып жаткан учурда мүмкүн болушунча башты коргоого аракет кылыш керек.
"Кар жааган учурда адам тайгаланып жыгылышы мүмкүн экенин эске алып коюшу маанилүү. Канткенде жыгылбайм деп ойлонуп жүрүшү зарыл. Муздуу жерлерден мүмкүн болушунча айланып өткөнгө аракет кылуу кооптуулукту алдын алат. Бул жерде бут кийимдин орду да өзгөчө. Албетте, ар ким өзүнүн капчыгына жараша бут кийим тандайт. Тайгак жерден адам жыгылып жатканда көп учурда өзүн башкара албай калат. Бирок колдон келишинче кулап жатканда бир бут жерден көтөрүлгөндөн кийин экинчи бутту жерден үзбөгөнгө аракет кылыш керек. Ар кандай жыгылгандыктан адамдар түрдүү жаракат алышат. Эгер колдо бир нерсе бар болсо, аларды дароо ыргытып адам өзүн коргошу шарт. Алдыга жыгылып бараткан учурда кол менен бетти тосом деп кол жабыр тартат. Башты мүмкүн болушунча коргоо абдан маанилүү. Артка кулап жатканда көбүнчө баш жаракат алышы мүмкүн. Башты коргоо үчүн ээкти төшкө болушунча жакындатып жыгылса оор жаракат алуу тобокелдиги азаят. Кол менен бут сынган же чыккан учурда сырттан караганда окшош болот. Алардын так диагнозун рентген аркылуу гана биле алабыз. Жаракат алган адамды ары-бери жылдыра бербей Тез жардам кызматын чакыруу абзел. Эгер билген адамдар болсо биринчи медициналык жардам көрсөтүшү шарт. Ал эми билбегендер көбүрөөк залакасын тийгизип коюшу мүмкүн", — деди травматолог.
Ал айрымдар жаракат алган учурда шок абалында болуп ооруну өз учурунда сезбей каларын да кошумчалады.
