Эркелегендин чеги бар! Жапаров Кемпир-Абад боюнча чуу түшкөндөргө эскертүү берди

© Фото / пресс-служба полпредства правительства в Ошской областиКемпир-Абад суу сактагычы. Архив
Кемпир-Абад суу сактагычы. Архив - Sputnik Кыргызстан, 1920, 06.10.2022
Жазылуу
НовостиTelegram
Жапаров элди козутабыз деп бузукулук кылып жаткандарга мыйзам чегинде катуу чара көрүү үчүн тартип сакчыларына буйрук бере турганын айткан.
БИШКЕК, 6-окт. — Sputnik. Мамлекет башчы Садыр Жапаров социалдык тармактагы баракчасы аркылуу Кемпир-Абад суу сактагычынын айланасында бузукулук кылып, чуу чыгарып жаткандарга эскертүү берди.

"Эсиңер барда этегиңерди жыйгыла! Элди козутабыз деп бузукулук кылып жаткандарга мыйзам чегинде катуу чара көрүш үчүн тартип сакчыларына буйрук берем. Эркелегендин дагы чеги болот. Чектен ашып кетишти. "Залга батпай калдык, биз түшүнбөй калдык, маалыматыбыз жок" деп жалган сүйлөп, боз үй тигип жаткандар, Өзгөн акимчилигине келгиле. Күнү-түнү дебей ар бирине документтердин баарын көрсөтүп, түшүнүгү жок болсо мээсине куюп, түшүндүрүп беребиз. Кечээки жыйындын аягында добушка салганымда адамча түшүнгөндөр колдоп беришти. Добушка койгондо залдын баары макул, сегиз киши каршы болду. Албетте, каршы болгондор кимдер экенин, эмне максатты көздөп жаткандарын жакшы билебиз. Андай арам ойлуу максатыңардан кайткыла. Бийлик башына келип, 30 жылдан бери ашкере эркелеп жүрүп мамлекетибизди жок кылып же толук көз каранды мамлекетке айлантып ала жаздаганыбызды көрдүм. Андайга жол бербейбиз. Жакын арада баары бүтүп, ачыкка чыгат. Ошондо чек ара маселеси 99 пайыз биздин пайдабызга чечилгенин билип, өзүңөр эле эл алдында уят болуп каласыңар, туугандарым. Тынч болгула", — деп жазган президент.

Кыргыз-өзбек чек арасындагы Кемпир-Абад суу сактагычы боюнча маселе кайрадан кыргызстандыктардын көңүл чордонунда. Буга чейин Бишкекке Өзбекстандын премьер-министри Абдулла Арипов келип, УКМК төрагасы Камчыбек Ташиев экөө кыргыз-өзбек мамлекеттик чек арасынын айрым тилкелери жөнүндө жаңы келишимдин долбоорун макулдашуу боюнча процедураны баштоого мүмкүндүк берген протоколго кол коюшкан. Андан кийин өкмөт Өзбекстан менен чек ара маселеси тынчтык, сүйлөшүү жолу менен чечилгенин билдирген.
Социалдык тармактын колдонуучуларынын айрымдары Кыргызстан Кемпир-Абад суу сактагычынан кол жууп калышы ыктымал деп кооптонууда. 4-октябрда райондук администрациянын алдына чогулган эл менен мамлекет башчы жолугушуу өткөргөн.
Мамлекет башчы Садыр Жапаров  - Sputnik Кыргызстан, 1920, 06.10.2022
Жер берген жокпуз, алдык. Садыр Жапаров Кемпир-Абад боюнча билдирүү жасады
Жаңылыктар түрмөгү
0