Калбеков: акысыз юридикалык жардам берүү системасынын иши өзгөрөт
© Sputnik / Асель Сыдыкова
Жазылуу
Юстиция министрлигине караштуу Мамлекет кепилдеген юридикалык жардамды координациялоо борборунун директору Акжол Калбеков эми аталган борбор калктын юридикалык сабатын жогорулатууга аракеттенерин айтты.
Мамлекет кепилдеген юридикалык жардам берүү борборунун иштеп жатканына беш жылга чукулдап калды. Мурда биз калкка адвокат кызматын акысыз көрсөтүү менен чектелип келсек, эми комплекстүү аракеттерге өтүп жатабыз. Мыйзамга өзгөртүү кирип жатат. Бул тууралуу Акжол Калбеков Sputnik Кыргызстан радиосуна маек куруп жатып билдирди.
Калбеков: акысыз юридикалык жардам берүү системасынын иши өзгөрөт
Анын айтымында, борбордо 450дөн ашуун жактоочу элге акысыз кызмат көрсөтөт.
"Борбордун иши калктын тиешелүү катмарын адвокат менен камсыздап гана чектелип келчү. Эми мыйзамга киргизилип жаткан өзгөрүү, толуктоолорго байланыштуу комплекстүү иштейбиз. Биринчи максатыбыз — элдин юридикалык сабаттуулугун жогорулатуу. Жүргүзгөн сурамжылоолорубузга ылайык, калктын көбү кадимки эле жер каттатуу, паспорт алуу сыяктуу иштерде юридикалык сабаттын жетишпеген көйгөйүнө туш болушат экен. Экинчиден, кандайдыр бир маселе жаралып калган учурда биздин борбордун аймактагы өкүлчүлүгүнө кайрылып, акысыз кеп-кеңеш ала алышат. Үчүнчүдөн, көйгөй жаралган маалда жактоочунун кызматынан бекер колдонушат. Адвокаттарга гонорарды мамлекет төлөп берет. Кайрылган киши каражат коротпойт. Борбор жаңы ачылганда жактоочулардын айлыгына жылына 15-16 миллион сом акча бөлүнчү, 2019-жылдан тарта бул сумма 70 миллионго жетти. Адвокаттарга бөлө келгенде бул ар бир жактоочуга айына 14-15 миң сомдон гонорар берилет. Ал адвокаттар бир айда бир нече ишти аягына чыгарышат", — деди Калбеков.
Ал үй-бүлөлүк зомбулуктан жабыр тарткандар, адам сатуунун курмандыгы болгондор да акысыз адвокат мамлекеттик кызматынан колдоно алышарын кошумчалады.
