Жапар уулу: Чувашиядагы фестивалда "Акыркы көчтүн" сценарийи мыкты деп табылды
10:54 14.06.2022 (Жаңыртылды: 10:55 14.06.2022)
© Sputnik / Асель Сыдыкова
Жазылуу
Режиссер Дастан Жапар уулу "Атанын керээзи", "Акыркы көч" тасмалары жалпы 40тан ашык эл аралык сыйлыкка ээ болгонун белгиледи.
Чебоксар эл аралык кинофестивалына буга чейин 2017-жылы "Атанын керээзи" тасмасы менен катышып, гран-прини жеңип алган элек. Фестивалдын уюштуруучулары экинчи ирет киносынакка катышууга чакырып, мунусунда да байгелүү кайтканын Дастан Жапар уулу Sputnik Кыргызстан радиосунда маек куруп жатып билдирди.
Жапар уулу: Чувашиядагы фестивалда "Акыркы көчтүн" сценарийи мыкты деп табылды
Анын айтымында, эки киши сценарий жазып, бир тасмага режиссерлук кылуусу бир топ артыкчылыктарга ээ. Себеби бири көрбөгөн кемчиликти экинчиси толуктап, ишти бөлүшүп жасап, айрым маселелерди талкуулап, талашып-тартышып, жыйынтыгында мыкты тасма жаралат.
"2-июндан 7-июнга чейин Чувашиянын борборунда этникалык жана аймактык киного арналган юбилейлик XV Чебоксар эл аралык кинофестивалы өттү. Салт боюнча көрүүчүлөрдүн назарына көркөм жана этникалык, аймактык фильмдерден турган эки сынактык программа тартууланды. Кинофестивалдын сынагына кыргызстандык эки тасма кирген, анын ичинде "Акыркы көч" фильми көркөм тасмалардын сынагына катышты. Фильм "Мыкты сценарий" номинациясын жеңип алды. Аталган лентанын сценарийин Бакыт Мукул, мен жана Нурлан Абдыкадыров жазганбыз. Анда улгайып калган белгилүү жазуучунун акыркы күндөрү чагылдырылат. Социалдык теңсиздик, жалпы маданият, искусство тармагында эмгектенген адамдардын камкордукка алынбаган абалы баяндалган. Бакыт Мукул менен иштешкенибизге 10 жыл болуп калды. Негизи биз сценарийди ар кандай темада жазабыз. Отуруп алып окуяларды, теманы талкуулап, ошонун жыйынтыгында иштегенге материал чогулат. 2014-жылдан баштап сценарий жазып, алгачкы "Атанын керээзи" фильмин тарттык. Себеби башка сценарийдин авторлору эмгектерин бергилери келбейт, анын үстүнө өлкө аймагында сценаристтер жокко эсе. Эки тасма тең ар кандай фестивалдарда "Мыкты сценарий" номинациясын алышкан. Бул ийгиликтер бизге стимул берет", — деди Жапар уулу.
Ал "Атанын керээзи", "Акыркы көч" тасмалары жалпы 40тан ашык эл аралык сыйлыкка ээ болгонун кошумчалады.
