Психологдун кызматынан колдонордо анын дипломун сурагандан тартынбагыла. Бул тууралуу Айдана Абакова Sputnik Кыргызстан радиосунда маек куруп жатып белгиледи.
Абакова: психологго кайрылганда анын дипломун сурагандан уялбагыла
Анын айтымында, адам психологго жазылардан мурда ага кайсы көйгөй боюнча кайрылуусун аныктап, берчү суроолорун, өзүнүн каалоосун тактап алуусу зарыл.
"Адам жаралган көйгөйүнүн жообун өзү билет. Эгер ал өзү менен өзү ээн калып, ички каалоолоруна, таарынычтарына, кыял, максаттарына жана көйгөйдүн каерден келип чыкканына көңүл буруп талдап алса, анын жообун да өзү эле табат. Мындай анализ жүргүзө албай же бирөөнүн көмөгү керек деп чечкен учурда гана психологго кайрылса болот. Бирок адистерге жарнама аркылуу же башка бирөөнүн көрсөтмөсү менен эле жазыла берген болбойт. Анткени ар бир адам өзүнчө дүйнө. Бир кишиге туура келген психологдун методу башкага жакпай калышы ыктымал. Андыктан анын биринчи кабыл алуусунда, консультацияда болгондо эле анын жеке сага туура келер, келбесин байкаш керек. Биринчи кезигишүүдө эле кысынып, оюңду толук жеткире албай, ачылып сүйлөшө албасаң, демек, бул адис сага туура келбейт. Башкасын издеп көр. Анан да психологдун дипломун, кошумча билимин, учурда билимин өркүндөтүп жатабы, кандай кесиптик жетишкендиктери, канча сааттык иш тажрыйбасы бар, мына ушунун барын сурап, билип алган туура. Мунун эч кандай уяты жок. Мындан сырткары, эгер психолог "сиздин көйгөйдү мынча сеанста чечип берем" деп так санды айтса, ал мыкты адис эмес. Ошондой эле акыл айтып, кеңеш берип же сиздин келген маселеңизди туура эмес деп сизди "соттогон" психологдон да эч кандай жыйынтык күтпөй эле коюңуз", — деди Абакова.
Ал эгер бир психолог жакпай калса ага барууну токтотуп башкасына кайрылуунун эч кандай терс жагы жок экенин кошумчалады.
Подкасттын толук вариантын аудиодон угуңуз:
