БИШКЕК, 24-дек. — Sputnik. Мурдагы президент Алмазбек Атамбаевдин ден соолугу жакшы эмес, андыктан эртең барып жолугам деп убада бергем. Бул тууралуу маалымат жыйын учурунда УКМКнын төрагасы Камчыбек Ташиев журналисттерге айтты.
"Эртең, жума күнү барып, кабар алам деп убада бергем. Чынын айтсам Алмаз Атамбаевдин ден соолугу начар болуп турат. Эгер зарылдык болсо ооруканага которуу чечимин кабыл алам. Анткени ал саламаттыгын чыңдап алып мыйзам алдында жооп бериши керек", — деди Ташиев.
Эске салсак, учурда Атамбаев УКМКнын тергөө абагында кармалып турат. Жактоочулары буга чейин анын ден соолугу начар экенин айтып келишкен. Бирок кечээ, 23-декабрда, абалы жакшырып калгандыктан Биринчи май райондук сотундагы жараянга алып келинген.
