СССРдин эл артисти Муратбек Рыскулов менен кинорежиссер, сценарист Төлөгөн Сыдыковдун сүрөтү 1972-жылы Ош облусунда тартылган.
Ал жылы белгилүү режиссер Геннадий Базаров жазуучу Мурза Гапаровдун чыгармасынын негизинде "Көчө" тасмасын тартып, ага кыргыз элинин залкар актерлору катышкан.
Ошол кезеңди КРдин кинематографисттер союзунун мүчөсү Төлөгөн Сыдыков мындайча эскерет:
"Чындыгында ал тасмада актердук курам күчтүү болгон. Мен экинчи режиссер элем. Актер Муратбек Рыскулов менен түшкөн сүрөт иш маалында тартылган. Ал киши тасма тартыла баштаганда кырк кадам басат, анан "балдар, кан басымым көтөрүлүп кетти, эс алайын" деп ишти эртеңкиге калтырчу. Бир күнгө ага 40 рубль төлөнүп берилчү. Ошондон улам аны режиссер Мелис Убукеев 40 кадам деп койчу. Абдан тамашакөй киши эле, жаштарга жакшы мамиле кылгандыктан ата катары эле көрчүбүз. Жарыктык киши конокко көп барат. Мейманда отурганда үй ээсине менин 60 балам бар деп бизге бир мүшөк устукан алып келчү. Байбичеси Сабира Күмүшалиева аны бизге бөлүштүрчү. Залкарлар абдан жөнөкөй болушат деп коет эмеспи. Ал инсан менен республиканын башында тургандар чуркап келип саламдашчу, кайда барбасын төрдүн көркү эле. СССРдин эл артисти болгонуна карабай өтө жөнөкөй, карапайым болуп, биз менен аралашып эле жүрчү. Командировкада жүргөндө жаш балдар акчасын коротуп коюп тыйыны жок калышчу. Пейили кенен, адамгерчилиги бийик актер жаштарга тамак-аш алып берип калчу", — деди Сыдыков.
Ал ошондой эле аталган тасмага кыргыз киносунун чыгаан актерлорун чогултуп иштешкен Геннадий Базаровдун эмгегин баса белгилеп кетти.
Тамашалашып отуруп эле "Көчөнүн" көркүн чыгарышкан. Таберик сүрөт
Бир айылдын турмушун чагылдырган кинодо Исмаилбек Абдубачаев, Сабира Күмүшалиева, Насыр Кытаев, Нуртай Борбиев, Алиман Жангорозова, Советбек Жумадылов, Бакен Кыдыкеева, Чоро Думанаев да роль жараткан. Фильм ошол эле жылы көрүүчүлөргө сунушталып, жакшы кабыл алынган.
