СССРдин эл артисти Муратбек Рыскулов менен белгилүү режиссер Геннадий Базаровдун сүрөтү 1972-жылы Ош облусунда тартылган.
Ал жылы "Көчө" тасмасы тартылып, ага Кыргыз улуттук академиялык драма театрынын бир топ таланттуу актерлору катышкан. Анда Рыскулов айылда жашаган чалдын образын жараткан.
Ал учурду Геннадий Базаров мындайча эскерет:
"Тасманын сценарийин Мурза Гапаров жазып, ошол кишинин айылында тартылган. Ага Муратбек Рыскулов, Советбек Жумадылов, Насыр Кытаев, Сабира Күмүшалиева, Алиман Жангорозова, Бакен Кыдыкеева өңдүү кыргыз театрынын уюткулары катышкан. Кезинде аларды биз ошол тасмага чогултуп алган экенбиз. Чынында ал актерлор өзүнүн катышуусу менен эмгекти шөкөттөшкөн, импровизациялап өздөрүнүн тамашаларын кошкон. Ошондуктан тасма жөнөкөй жана көрөрмандардын сүймөнчүлүгүнө айланган. Залкарлар менен режиссер катары иштешүү аябай жеңил болчу. Кичине кезимде Муратбек Рыскуловдун тизесинде отуруп ойноп калгам, ал киши менин тасмамда тартылып калат деп ойлобоптурмун. Алгачкы кино жылдыздар эле, ал кезде кыргыздардын арасында режиссер жок болуп, башка улуттун өкүлдөрү бизге келип тасма тартчу", — деди Базаров.
Азыркы Токтогул суу сактагычы жайгашкан аймакта жашаган бир айылдын жашоочуларынын турмушун жана көчүүсүн чагылдарган кинодо Исмаилбек Абдубачаев, Нуртай Борбиев, Чоро Думанаев да роль жараткан. Фильм ошол эле жылы көрүүчүлөргө сунушталып, жылуу кабыл алынган.
