Сагынбаев: тамчылатып сугарууда отоо чөптөр азаят
Даректүү сугарууда суу 2-3 эсе үнөмдөлөт. Ошондой эле отоо чөптөрдүн азаюусуна мүмкүндүк түзөт. Бул тууралуу Аскарбек Сагынбаев Sputnik Кыргызстан радиосуна маек куруп жатып билдирди.
Анын айтымында, өлкөдө жайма сугаруу, жөөктөп сугаруу, жамгырлатып сугаруу жана тамчылатып сугаруу ыкмалары колдонулат.
"Жайма сугаруу – бул ыкма менен күрүч, көп жылдык чөптөр, буудай, арпага колдонулат. Ал үчүн суу айдоо талаасына жайылып коё берилет. Ал эми жашылча, бакча, тоют өсүмдүктөргө жөөктөп сугаруу ыкмасы жакшы. Аты айтып тургандай эле ар бир жөөккө суу коё берилет. Бул эки ыкмада сугарган адам тажрыйбалуу болбосо, өсүмдүк жетиштүү суу ичпей калат. Аталган ыкмаларда суу коромдуу болот. Мындан тышкары жамгырлатып сугаруу дагы кеңири колдонулуп жүрөт. Бул үчүн көбүрөк каражат керектелет. Чоңураак кооперациялар гана жамгырлатып сугарууну орнотпосо, карапайым дыйкандардын чөнтөгүнө чак келбей калышы ыктымал. Анан технологиянын өнүгүшү менен кошо келген ыкма – тамчылатып сугаруу. Мунун башкача аталышы даректүү сугаруу делип дагы жүрөт. Мындай жол менен сугарууда суу 2-3 эсе үнөмдөлөт. Анткени суу түтүк менен жеткирилип, өсүмдүктүн өзүнө гана тамат. Ошондой эле суу даректүү баргандыктан отоо чөптөр азаят", — деди Сагынбаев.
Адис сугаруу ыкмаларына жараша топурактын сапатын сактоого боло турганын кошумчалады.
