БИШКЕК, 29-апр. — Sputnik. Кыргызстан коронавирус пандемиясына байланыштуу жыл башынан бери салык жана бажы төлөмдөрүнөн келчү 10 миллиард сомдон кол жууду. Бул тууралуу маалымат жыйыны учурунда вице-премьер Эркин Асрандиев билдирди.
Анын айтымында, чек аралардын жабык турганына байланыштуу жылдык пландан бажы жыйымдары 45-50 пайыз артта калып бара жатат.
Мындан тышкары, салык жыйымдары дагы түшүп кеткен. Вице-премьер муну бир четинен Кытайдан келген импорттун азайышы менен байланыштырды.
“Бизге жалпы импорттун 70 пайызы Кытайдан келчү. Ал эми аны менен ички өндүрүшүбүз тыгыз байланышта. Мисалы, коңшу өлкөдөн биз чийки продукция, сырье, жабдуу жана тетиктерди алабыз. Бир жагынан алар жок, экинчи жагынан вируска байланыштуу чектөөлөр болуп, ишкерлик токтоду. Кесепетинде салык азайды”, — деди Асрандиев.
Ал акыркы маалыматтарга таянып билдиргендей, бюджетке жыл башынан бери салык жана бажы төлөмдөрүнөн келчү 10 миллиард сомдой каражат түшпөй калды.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
